«Кропаль» қылмыстық тобының жетекшісі делінген күдікті ұсталды
Бұған дейін Алматыда «Кропаль» ұйымдасқан қылмыстық тобының жетекшісі делінген Асылбек Түлетпековті ҰҚК қызметкерлері ұстағаны жөнінде ақпарат тараған еді.
Астана, NEGE. Бүгін, 3 ақпанда ведомствоның баспасөз қызметі бұл ақпаратты растады.
«2026 жылғы 2 ақпанда Алматы қаласында ҰҚК Шымкент қаласы бойынша департаменті қалалық прокуратураның үйлестіруімен қылмыстық ортаның өкілі "Т"-ны ұстады. Ұсталған адам уақытша ұстау изоляторына қамалды», – делінген хабарламада.
Ол аса ірі көлемдегі қаражатты қорқытып алды деген күдікке ілінген.
Сондай-ақ осы іс аясында Шымкент қаласында оның екі сыбайласының құқыққа қарсы әрекеті тоқтатылған.
Қазіргі уақытта сотқа дейінгі тергеп-тергеу жүргізілуде.