Корона-такси іске қосылды
Індеттің ілмегіне іліккелі бері жедел жәрдем қызметкерлері дамылсыз жұмыс істеп жатыр. Қазір оларға түсетін шақырту саны да артқан.
Алматы, NEGE. Жедел жәрдем жұмысын жеңілдету мақсатында Атырауда корона-такси іске қосылды. Қауіпсіздік ережелері қатаң сақталған. Қазір екі корона-такси тек түнгі ауысымда қызмет етеді. Алдағы уақытта олардың санын көбейту жоспарланып отыр. Бұл қызметті қызуы көтерілгендер, коронавирус пен пневмонияның симптомдары байқалған тұрғындар пайдалана алады.
Облыстық жедел жәрдем қызмет станциясы директорының міндетін атқарушы Нарғыз Баймолдаева: "Жедел жәрдем ретінде бригада жұмыс жасайды. Бір жүргізуші, бір фельдшер жұмыс жасайды. Олар ковид ауруларына, пневмония ауруларына және ковид күдігі бар науқастарға барып, көмек көрсетеді. Коронавирустық науқастар манағы ауруханадан шығып, немесе үйлерінде жалғыз өздері болып, дәріханаға барып, дәрілерін ала алмай жатса, жаңағы ковид такси көмек көрсете алады. Жедел жәрдем бригадаларындағыдай планшет болады. Сол арқылы көмек көрсетіледі", - деді.