«Көп қан кетсе жағдай қиын болар еді» – Ләйлә Сұлтанқызы FlyArystan әуекомпаниясының үстінен арыз түсірді
Бұл туралы Ләйлә Сұлтанқызы әлеуметтік желідегі парақшасында мәлімдеді.
Алматы, NEGE. Ләйлә Сұлтанқызының айтуынша, жанындағы жолаушының абайсыздығынан бетіне үстіңгі сөреде тұрған ауыр зат құлаған. Ал әуекомпанияның қызметкерлері алғашқы көмек көрсетуге дайын болмаған.
«Бүгін кешкі 21:50 шамасында KC7326 рейсімен Шымкенттен Астанаға ұшып келдім. Ұшақтың есігі ашылмай, тұрып кеткен жанымдағы жолаушының абайсыздығынан бетіме үстіңгі сөреде тұрған ауыр (қатты) зат, отырған маған құлап, көзімнің тұсын жырып, қабағым жарылды. Бұл @flyarystan әуекомпаниясы қауіпсіздік шарасын сақтамағандықтан орын алған жағдай. Бордсеріктер мен әуекомпанияның алғашқы көмекке дайын емес болғанына қапа болдым! Не аптечка, не мұз, не суық зат, не қан тоқтатын, не салфетка жоқ. Меніңше, орнымда бала, қарт адам отырып, басы жарылса, қатты жараланса, миы шайқалса, көп қан кетсе жағдай қиын болар еді. Жауапсыздық! Әр бортсерік жолаушы мініп-түскенше адам денсаулығына жауапты, алғашқы көмек көрсетуге міндетті!», – деп жазды Ләйлә Сұлтанқызы.