Көкшетауда жалғызбасты ана жол апатынан қаза тапты: күдіктінің жүргізуші куәлігі болмаған
Көкшетауда жол-көлік оқиғасы салдарынан 12 жастағы баланы жалғыз тәрбиелеп отырған 52 жастағы әйел көз жұмды.
Астана, NEGE. Қайғылы оқиға 9 мамыр күні Сарыарқа көшесіндегі тұрғын үй ауласында болған.
Полиция бұл дерек бойынша екі қылмыстық іс қозғады. Тексеру кезінде күдікті әйелдің жүргізуші куәлігі болмағаны және автомектепте оқымағаны анықталды.
«Көлікті басқарған әйелге қатысты адам өліміне әкелген жол қозғалысы ережелері мен көлік құралдарын пайдалану талаптарын бұзу фактісі бойынша сотқа дейінгі тергеу жүргізіліп жатыр», – делінген хабарламада.
11 мамыр күні ол үйқамаққа алынды.
Сонымен қатар көлік иесі – оның жұбайына қатысты да жеке іс қозғалды. Оған көлікті жүргізуші куәлігі жоқ адамға басқаруға берді деген айып тағылып отыр.