Клубтар арасындағы әлем чемпионаты: «Реал Мадрид» жартылай финалға шықты
Футболдан клубтар арасындағы әлем чемпионатының ширек финалында Испанияның атақты «Реал Мадрид» командасы Германияның «Боруссия Дортмунд» клубын 3:2 есебімен жеңіп, жартылай финалға жолдама алды.
АЛМАТЫ, NEGE. Ойын тартысты өтті. «Реалдың» сапынан Гонсало Торрес 10-минутта есеп ашса, Франсиско Гарсия 20-минутта, ал Килиан Мбаппе қосымша уақытта – 94-минутта үшінші голды соқты. Дортмундтықтардан Максимилиан Байер (92-мин) мен Серу Гирасси (98-мин) екі голмен жауап қайырғанымен, есепті теңестіре алмады.
Осылайша мадридтік ұжым 3:2 есебімен басым түсіп, жарысты жалғастыру мүмкіндігін сақтап қалды. Енді олар 9 шілдеде өтетін жартылай финалда Францияның «Пари Сен-Жермен» командасымен кездеседі. Айта кетейік, ПСЖ бұл кезеңге жолдаманы Германияның «Бавария» клубын 2:0 есебімен жеңу арқылы алған болатын.
Тағы бір жартылай финалдық жұп – Бразилияның «Флуминенсе» мен Англияның «Челси» клубтары. Олар 8 шілдеде өзара мықтыны анықтайды. Бұған дейін «Флуминенсе» Сауд Арабиясының «Аль-Хиляль» клубын, ал «Челси» Бразилияның «Палмейрасын» 2:1 есебімен жеңген еді.
Турнирдің жалпы жүлде қоры – 1 миллиард АҚШ долларын құрайды. Чемпион атанған команда 125 миллион доллар сыйақыға ие болады. Қалған сома турнирге қатысушы 32 клуб арасында нәтижелеріне қарай бөлінеді.
