Қызылшаның өршуі: екпе алмаған балаларды сабаққа кіргізбейді
Бас санитариялық дәрігер Сархат Бейсенова ел аумағында қызылшаның өршуіне байланысты жаңа қаулыға қол қойды.
Астана, NEGE. Санитарлық-эпидемиологиялық бақылау комитетінің мәліметінше, жыл басынан бері елде 3 343 жағдай тіркелген, оның 84,2%-ы (2 816 жағдай) 14 жасқа дейінгі балалар арасында анықталған.
«Жағдайлардың 77,6%-ында (2 594) екпе алмаған балалар ауырған: вакцинадан бас тарту себебінен – 1 448, медициналық қарсы көрсетілімдер бойынша – 325, екпе жасына жетпеуіне байланысты – 778, өзге себептермен – 43. Ал 11,9% жағдайда (398) науқастардың екпе статусы белгісіз», – делінген хабарламада.
Халық арасында қызылшаның одан әрі таралуының алдын алу мақсатында жаңа қаулы қабылданды. Қаулыда қызылшаға, қызамыққа және паротитке қарсы иммундауды ұлғайту көзделген. Соның ішінде:
- 6 айдан 10 ай 29 күндік балаларды жағдай тұрақталғанға дейін иммундау;
- 2 жастан 5 жасқа дейінгі вакцинацияланбаған балаларға қосымша иммундау;
- қызылшаға қарсы вакцинацияланбаған 7 жастан 18 жасқа дейінгі балаларға толықтыра иммундау;
- 30 жасқа дейінгі вакцина алмаған денсаулық сақтау ұйымдарының медицина қызметкерлері мен қызметкерлеріне иммундау жүргізу қарастырылған.
Қаулыға сәйкес, облыстардың және Астана, Алматы және Шымкент қалаларының білім басқармалары басшылары:
- білім беру объектілерінде және мектепке дейінгі ұйымдарда жіті респираторлық ауру көріністері бар тәрбиеленушілерге, оқушыларға, педагогтар мен тәрбиешілерге жол бермеу үшін «таңертеңгі сүзгі» жүргізуді;
- қызылша жағдайларын тіркеу кезінде екпе алмаған балаларды мектепке дейінгі ұйымдарға және мектептерге жіберуді уақытша тоқтатуды;
- иммундау мәселелері бойынша ата-аналар арасында ақпараттық-түсіндіру жұмыстарын күшейтуді қамтамасыз етуі тиіс.
Қаулы жарияланған күннен бастап қолданысқа енгізілді.
