Қырғызстанда арнайы куәлігі жоқ блогерлерге діни уағыз айтуға тыйым салынды
Қырғызстанда дін тақырыбында контент жасайтын блогерлерге жаңа талап енгізілді. Енді әлеуметтік желіде дін туралы ақпарат тарататын азаматтар арнайы куәлік алуға міндетті.
Астана, NEGE. Дін және этносаралық қатынастар жөніндегі ұлттық агенттіктің бас маманы Нұрғазы Қырғызбаевтың айтуынша, заңға «діни уағызшы» деген жаңа ұғым енгізілді, деп хабарлайды 24.kg.
Енді діни тақырыпта жазба жариялайтын блогерлер алдымен Қырғызстан мұсылмандары діни басқармасына жүгініп, діни білімін растауы керек. Сондай-ақ блогын қандай бағытта жүргізетінін көрсетуі тиіс.
Одан кейін Дін істері жөніндегі мемлекеттік агенттіктен арнайы куәлік алуы қажет. Құжат бір жылға беріледі.
Егер блогер заң талаптарын бұзып, қате ақпарат таратса, куәлігінің күші жойылады. Мұндай жағдайда оған жаңа куәлік берілмеуі мүмкін.
Нұрғазы Қырғызбаев бұл талап подкаст жүргізетін, діни тақырыпта пост пен пікір жазатын, өзінің діни қызметі туралы айтатын және уағыз айтатын азаматтардың барлығына қатысты екенін атап өтті.