ҚХП-ның жаңа төрағасы: Дариға Назарбаевамен ешқандай туыстығым жоқ
Қазақстан халық партиясының (ҚХП) жаңадан сайланған төрағасы Нұрсұлтан Шоқанов өзін Дариға Назарбаевамен байланыстыратын қауесеттерді жоққа шығарды.
Астана, NEGE. Соңғы күндері әлеуметтік желілерде Нұрсұлтан Шоқановтың тұңғыш Президенттің үлкен қызы Дариға Назарбаевамен туыстық байланысы болуы мүмкін деген ақпарат тараған болатын. Оның айтуынша, бұл ақпарат шындыққа жанаспайды.
«Бұл ақпарат бұрыннан тарап келеді. Менің Дариға Назарбаевамен ешқандай байланысым жоқ. Қазақстан – шағын мемлекет, мұндай дүниені тексеру қиын емес. Менің Дариға Нұрсұлтанқызымен де, басқа да саяси тұлғалармен де ешқандай туыстық байланысым жоқ», – деді Шоқанов.
Еске салайық, Нұрсұлтан Шоқановтың Қазақстан халық партиясының төрағасы болып сайлануы әлеуметтік желілерде қызу талқыға түсті. Бұған дейін оның блогер ұлы да белгілі бір медиа жобада мектепте Қазақстан тарихы пәнін оқытпайтынын айтып, басы дауға қалған еді.