Кесер тілігі: қазақ және француз мамандары маңызды проблеманы талқылады
Әлемде тұңғыш рет босанатын әйелдердің орташа жасы 30-дан асқандықтан, кесер тілігі арқылы босанатын келіншектер саны көбейген. Бұл әлемдік гинекология мен акушерлік саласына жаңа міндеттер мен тәуекелдер әкеліп отыр. Алматыға келіп тәжірибесімен бөліскен француз мамандары осындай пікір білдірді.
Қазіргі таңда Дүниежүзілік денсаулық сақтау ұйымының кесар тілігі операциясы көлемінің 15%-ын ұстап тұру туралы ұсыныстарына қарамастан, Францияда бұл көрсеткіш 20%, Италияда 35% құрайды. Қазақстанда да табиғи босану емес, кесар тілігіне жүгінетін аналар саны күрт артуда. Ал оның қатерлері аз емес. Бұл туралы Алматыға келген Страсбург университеттік ауруханаларының гинекологиялық онкология кафедрасының меңгерушісі, доктор Cherif Akladios мәлімдеді.
«Бұрын алғаш босанатын әйелдердің орташа жасы 20 жас болса, бүгінде ол 30 жастан асты. Алғаш босанатын әйелдердің айтарлықтай өсуі (70%-ға) 40 жастағылар арасында да байқалады. Қоғамдағы осы құбылыстар дәрігерлерден тәсілдерді өзгертуді және жылдам шешім қабылдауды талап етеді»
Страсбург университеттік ауруханалары профессорлары мен дәрігерлерінің делегациясы Алматыдағы ҚР Акушерлік, гинекология және перинатология ғылыми орталығына келген болатын. Бұл іс-шара француз және қазақстандық мамандар арасындағы ынтымақтастық пен тәжірибе алмасудың маңызды кезеңі болды. Қазіргі уақытта Страстургта медицина және физиология бойынша 6 Нобель сыйлығының лауреаттары қызмет етеді әрі Еуропадағы акушерлік қызметтің даму тамыры осы Страсбургтен бастау алады.
Делегацияны қарсы алған ҚР Денсаулық сақтау вице-министрі Вячеслав Дудник «Мемлекет басшысы аурулардың алдын алу және денсаулық сақтау жүйесінің тиімділігін арттыру арқылы Қазақстан халқының денсаулығын жақсартуға үлкен көңіл бөлуде» деп атап өтті.
«Денсаулық сақтау, білім және ғылым мамандарын, резиденттерді, практиктерді және медицинаға жаңа технологияларды енгізетін зерттеушілерді біріктіруге арналған «Страсбург университеттік ауруханаларының тәжірибесі» халықаралық семинары тәжірибелік көмек көрсетуді жақсарту үшін медицинаға жаңа технологияларды енгізуге бағытталған. Ол екі ел арасындағы диалогтың нағыз алаңына айналатынына сенімдімін. Нағыз кәсіпқойлар екі ел арасындағы жемісті ынтымақтастықты бастады»
Страсбург университеттік ауруханаларының делегациясы Алматыға EPG адами капиталды дамыту қорының ұйымдастыруымен келіп отыр.
«Бұл жолы біз Франциядан сапалы мамандардың келуіне қолдау білдірдік. Алдағы уақытта қазақстандық дәрігерлермен тәжірибе алмасу үшін әлемдік деңгейдегі үздік сарапшыларды шақырып, елдегі медицинаның сапасын арттыруға атсалысатын боламыз», – деді, EPG қоры директорлар кеңесінің мүшесі Балтабек Мұқашев.
Акушерлік, гинекология және перинатология ғылыми орталығы біздегі акушерлік қызметінің жетекші ғылыми орталығы болып табылады. Ғылыми орталық клиника, ғылым және білім үштұғырлылығы қағидасын ұстанып, Асфендияров атындағы Қазақ ұлттық медицина университетінің университеттік емханасы ретінде қызмет етуде. Қазір отандық акушерлер алдындағы ең маңызды мақсат - босану кезіндегі өлім-жітімді тоқтату, осыған қатысты әлемнің үздік тәжірибелерін дереу енгізіп отыру.
