Кептелістен – жүйеге: Шымкентте көлік инфрақұрылымы жаңғыртылып жатыр
Шымкент – Қазақстандағы қарқынды дамып келе жатқан қалалардың бірі. Бұл өңірде көлік инфрақұрылы қазіргі талаптарға сай етіп бейімдеуді бұрыннан талап етеді.
Шымкент, NEGE. Халық санының өсуі, автокөліктердің артуы және қаланың аумақтық кеңеюі жергілікті билік алдына жаңа міндет қойып отыр. Ол – жеке-жеке жатқан жол учаскелерін біртұтас әрі орнықты жүйеге айналдыру.
Көлік инфрақұрылымын жаңарту бойынша кешенді бағдарлама мегаполисте 2024 жылы басталған. Ол тек жол мен жолайрықтарды салуды ғана емес, аялдамаларды, қауіпсіздік және жарықтандыру жүйелерін жаңғыртуды да қамтиды.
Жұмыс ауқымы: Көшелерден магистральдерге дейін
Ресми деректерге сүйенсек, 2024 жылдың соңына қарай қалалық жолдардың 75%-ы жақсы немесе қанағаттанарлық жағдайда болған. 2025 жылы бұл көрсеткішті 90%-ға жеткізу жоспарланып отыр. Негізгі күш жол желісінің байланысын арттыру мен орталық көшелерге түсетін жүктемені азайтуға бағытталған.
Ірі жобалардың қатарында — Еңбекші ауданындағы Момынов және Тіленшин көшелерінде теміржол өткелдерін салу бар. Бұл өткелдер қаланың шығыс бөлігін орталықпен байланыстырып, көлік санын қайта бөлуді және жұмыс істеп тұрған магистральдердің жүктемесін азайтуды қамтамасыз етеді. Момынов көшесіндегі құрылыс 2024 жылдың желтоқсанында басталған және қазіргі таңда жұмыстың жартысы орындалған.
Сонымен қатар, Қойкелді батыр мен Ақназар хан көшелерінің қиылысындағы апатты көпірге күрделі жөндеу жүргізіліп жатыр. Бұл жұмыс 2025 жылдың соңына дейін аяқталады.
Ең ауқымды жобалардың бірі — Қонаев даңғылының жалғасын салу. Жалпы ұзындығы — 16,3 км, жұмыс алты кезеңге бөлінген. Кейбір учаскелер пайдалануға берілді, тағы екеуі биыл аяқталады деп күтілуде, ал соңғы кезең 2026 жылы бітеді. Жаңа даңғыл көлікпен лық толы Республика даңғылының баламасына айналып, қаладан шығатын жолдағы жүктемені азайтуы тиіс.
Сондай-ақ, А-2 айналма жолы да қарқынды жаңғыртылуда. Ұзындығы 28,2 км болатын бұл транзиттік дәліз Шымкентті елдің басқа өңірлерімен байланыстырады және жүк тасымалында маңызды рөл атқарады. Алғашқы төрт кезеңі аяқталған, тағы үшеуі 2025 жылы тапсырылуы тиіс. Соңғы кезең 2026 жылы бітеді.
Стратегия шеңберінде жаңа байланыстырушы көшелер де салынып жатыр: Қазиев көшесінің жалғасы (1,7 км) Ақжайық және ShymCity шағынаудандарынан балама жолмен шығуды қамтамасыз етеді.
2026 жылға дейін билік жалпы ұзындығы 1 000 км-ден асатын 850 көшеге асфальт төсеуді жоспарлап отыр. Оның 540-ы — осы жылы жөнделеді.
Қауіпсіздік: Жаяу жүргіншіден жарық шамдарға дейін
Жол құрылыстарымен қатар, жол қауіпсіздігін қамтамасыз ету жұмыстары да күшейтілуде. 2025 жылы қалада 32 жаңа бағдаршам орнатылмақ, оның 10-ы қазірдің өзінде іске қосылған.
Реттелмейтін жаяу жүргінші өткелдері — жүйенің әлсіз тұстарының бірі. Қазіргі таңда жоспарланған 200 нүктенің 140-тан астамы жарықтандырылған. Сонымен бірге 6 000 жол белгісін орнату (жартысы орнатылып үлгерген), мектептер маңында жасанды бұдырлар жасау (1 200 метр), тротуарларды жаңарту (180 км — қалпына келтірілген) жұмыстары жүргізіліп жатыр.
Қаладағы 500 км көшеде жол сызықтары жаңартылды, ал су басу қаупі бар 30 көшеге жаңа ирригациялық науалар орнатылды. Көше жарығын жаңарту бағдарламасы 2 743 көшені қамтиды, олардың 1 550-сі жарықтандырылған.
