Келешек мектептері: Сапалы білімнің жаңа мүмкіндіктері
2022 жылы Қазақстан Президенті Қасым-Жомарт Тоқаев еліміздің орта білім беру саласын түбегейлі жаңғырту үшін «Жайлы мектеп» ұлттық жобасын жүзеге асыруды ұсынған еді. Жоба аясында республика бойынша 217 заманауи мектеп салу жоспарланып отыр.
Алматы, NEGE. Атауы «Жайлы мектептен» «Келешек мектептері» болып өзгерген бұл жоба балаларды заманға сай ортада тегін әрі сапалы біліммен қамтамасыз етуді көздейді.
Жобаның негізгі мақсаты – апатты мектептердің мәселесін түбегейлі жою, үш ауысымда оқыту мәселесін және оқушы орындарының жетіспеушілігін еңсеру. Келешек мектептері әдеттегідей салынып жатқан жаңа ғимарат қана емес. Ол еліміздің білім саласындағы іргелі өзгерістердің айғағы, өскелең ұрпақтың жарқын болашағына бағытталған сенімді қадам. Өткен жылы осындай жаңа үлгідегі 105 мектеп пайдалануға берілді, оның 40 пайызы ауылдық жерлерде салынды. Ал биыл тағы 112 «келешек мектебінің» құрылысы аяқталуы жоспарланып отыр. Осылайша, екі жыл ішінде 460 мыңға жуық оқушы заманауи талаптарға сай білім ордаларында оқуға мүмкіндік алмақ.
Ал Алматы қаласындағы жағдайға келетін болсақ, биылғы 1 қыркүйекте мегаполисте 12 жаңа мектеп пайдалануға беріледі. Алматы – халық тығыз орналасқан ірі қала. Сол себепті де мектеп жетіспеушілігі басты мәселеге айналған. «Келешек мектептері» жобасының Алматыда жүзеге асуы аталмыш мәселенің түйінін шешуге септігін тигізеді.
«Келешек мектептері» ұлттық жобасы аясында Алматы қаласында 34,8 мың оқушыға арналған 21 жаңа білім ошағының құрылысы жүріп жатыр. Оның ішінде 13 мектеп «Samruk-Kazyna Construction» компаниясының қолдауымен салынуда. Өткен жылы қалада бір жаңа мектеп пайдалануға берілсе, алдағы жаңа оқу жылы басталғанға дейін тағы жеті мектеп өз шәкірттерін қабылдамақ. Сондай-ақ тамыз айының соңына дейін бес мектептің құрылысы толық аяқталып, қыркүйек айында оқушыларға есігін айқара ашады.
Қалада 13 мектеп пен 8 қосалқы ғимарат сейсмикалық тұрғыда нығайтылып, қайта жөнделіп жатыр. Бұл жұмыстардың нәтижесінде 3 мыңнан астам қосымша орын ашылады.Осылайша, жаңа мектептердің ашылуы мен қолданыстағы оқу орындарының жаңартылуы Алматыдағы мыңдаған оқушыға қолайлы білім алу жағдайын қамтамасыз етеді.
Заманауи мектептерге жаңашылдыққа бет бұрған білікті ұстаздар қажет. Мемлекет оған да көңіл бөліп, ұстаздардың білімін жетілдіруге күш салуда.
ҚР Оқу-ағарту министрлігі «Өрлеу» біліктілікті арттыру ұлттық орталығы «Келешек мектептері» ұлттық жобасы аясында педагогтердің кәсіби құзыреттілігін дамытуға арналған кешенді бағдарламаны іске асыруды жалғастыруда. Жыл соңына дейін 3 мыңнан астам педагог онлайн-оқытудан өтеді.
Курстар базалық деңгейдегі 11 пәнді қамтиды: бастауыш сынып, қазақ, орыс және ағылшын тілдері, математика, информатика, физика, химия, биология, география және тарих. Оқыту «Өрлеу» LMS цифрлық платформасында өтеді, онда пәндік оқу материалдары мен мұғалімдер үшін қиындық тудыратын тақырыптарды айқындауға арналған диагностикалық тестілер ұсынылған. Бағдарлама пәндік білімді негізгі жұмысынан қол үзбей жаңарту, кәсіби құзыреттілікті арттыру және мұғалімдерге әдістемелік қолдау көрсетуге бағытталған.
Айта кетейік, өткен жылы «Келешек мектептері» ұлттық жобасы аясында 35 мектептен 2 мыңнан астам педагог біліктілікті арттыру курстарынан өтті. Оқыту қорытындысы бойынша қатысушылар кәсіби дамуын одан әрі жалғастыруға арналған жеке ұсынымдар берілді.
