Келесі жылдан бастап бизнеске салынатын салықтар саны 20%-ға қысқарады
Алматы, NEGE. Қазақстанда 2026 жылдан бастап бизнеске салынатын салықтар саны 20%-ға қысқарады. Бұл туралы Ұлттық экономика бірінші вице-министрі Азамат Әмрин Салық кодексінің нормаларын түсіндіруге арналған дөңгелек үстелде айтты, деп хабарлайды Қаржы министрлігі.
2026 жылғы 1 қаңтардан бастап Қазақстан Республикасының жаңартылған Салық кодексі күшіне енеді. Әмриннің айтуынша, құжат салықтық әкімшілендіруді кеңінен жеңілдетуді көздейді:
- есептілік көлемі 30%-ға,
- салық саны 20%-ға қысқарады.
«Жеңілдіктер мен алымдар оңтайландырылып, бірыңғай жер салығы жойылмақ. Төлемдердің жекелеген түрлері бойынша мөлшерлеме саны қысқартылады», - деді Ұлттық экономика бірінші вице-министрі.
Өзгерістер корпоративтік және жеке табыс салығынан бастап, инвестицияны ынталандыруға және салық жүктемесін қайта бөлуге дейінгі барлық негізгі бағытты қамтиды.
Азамат Әмрин арнайы салық режимі оңтайландырылатынын, яғни үшеуі қалатынын айтты:
- өзін-өзі жұмыспен қамтығандар үшін,
- жеңілдетілген декларация негізінде,
- фермерлік шаруашылықтар үшін.
Өзін-өзі жұмыспен қамтығандар мобильдік қосымша арқылы салықты есептеп, төлей алады.
Ол 16 қазанда «НҚА ашу»порталында талқылау аяқталған тыйым салу қызметінің тізбесіне жеке тоқталды.
"Біз бұл мәселені бірнеше ай бойы егжей-тегжейлі қарастырдық. Жаңартылған тізімде қолданыстағы заңнамаға ұқсас 44 позиция қалады — тау-кен және қаржы саласы, акцизделетін, алкоголь өнімін, қару-жарақты өндіру және өткізу және басқалар. Жақында құжат Үкіметтің қаулысымен бекітіліп, министрліктің ресми сайтында жарияланады", - Әмрин.
Қаржы вице-министрі Ержан Біржанов 1,9 миллионға жуық салық төлеуші арнаулы салық режимі шеңберінде жұмыс істеу мүмкіндігін сақтап қалатынын атап өтті.
«Бұған дейін кәсіпкерлер жалпы режимге көшуден қорқатын. Енді бұл мәселе шешілді. Арнайы режимге қатысушылар арасында өзара есеп айырысу кезінде шектеулер болмайды», - деп атап өтті ол.
