«ҚазМұнайГаз» басшысының тоғыз орынбасары не істейді?
«ҚазМұнайГаз» АҚ басқарма төрағасы Асхат Хасеновтің тоғыз орынбасары барын бұған дейін хабарлаған болатынбыз. Компания оларсыз жұмыс істей алмайтынын алға тартты: 80 мың қызметкер, бюджет пен Ұлттық қорға 2,3 триллион теңге – мұның барлығы бақылауда болуы керек.
Алматы, NEGE. ҚМГ-ның мәлімдемесіне сүйенсек, осындай қыруар шаруаның мүлтіксіз жұмыс істеуін қамтамасыз ететіндер – төраға орынбасарлары екен.
«Бүгінгі таңда «ҚазМұнайГаз» толық өндірістік циклді жүзеге асыратын еліміздегі жетекші мұнай-газ компаниясы. Оның қызметіне геологиялық барлау, мұнайды өндіру, өңдеу, тасымалдау, мұнай-химия, мұнай кәсібі қызметтері, мұнай және мұнай өнімдерінің маркетингі, төмен көміртекті дамыту жобалары, соның ішінде жаңартылатын энергия көздері жатады. Жұмыстың ауқымдылығына, мұнай-газ саласындағы стратегиялық маңызды жобаларды өз бетінше де, жетекші халықаралық компаниялармен бірге жүзеге асыруына, компания қызметінің әртараптандырылуына және мұнай-газ секторындағы жаңа міндеттерге байланысты ҚМГ басшылығы кешенді көзқарасты талап етеді және Басқарма Төрағасының әрбір орынбасары өндірістік салаға да, компанияның дамуы мен құнын арттыруға да жауапты:
- Қазақстанның мұнай өндіруші аймақтарындағы әлеуметтік тұрақтылық пен өндірістік қатынастарды басқару;
- Барлау және өндіру;
- Ірі мұнай-газ жобалары;
- Газ жобалары және төмен көміртекті дамыту;
- Мұнай өңдеу, маркетинг;
- Мұнай тасымалдау;
- Экономика және қаржы;
- Стратегия, инвестиция және бизнесті дамыту, мұнай-химия;
- Құқықтық қамтамасыз ету, корпоративтік қауіпсіздік, халықаралық ынтымақтастық және санкция мәселелері», – делінген ресми сауалдың жауабында.
Компания басқару құрылымы икемге келіп қалғанын, бизнес көлемінің артуына қарамастан, бұрынғы жылдармен салыстырғанда басқарушы лауазымдар саны айтарлықтай азайғанын атап өтті. Салыстырмалы түрде шетелдік компанияларды мысалға келтірді: SOCAR, Газпром және Татнефтьте осыған ұқсас тәжірибелер бар.
«Бұрын компанияның бағыты аз болған кезде, басқару аппараты көп болатын», – деп мәлімдеді ҚМГ.
Топ-менеджерлердің жалақысына келетін болсақ, ҚМГ оған қатысты ақпаратты жарияламады. Олар тек 2023 жылға дивидендтер 300 млрд теңге болғанын хабарлады.