«ҚазАвтоЖол» басшысы: Жүргізушілердің өздері кінәлі

Tengrinews.kz жазды.

Алматы, NEGE. «Біздің жүргізушілеріміз тіпті мұзтайғақ кезінде де сағатына 160-200 шақырым жылдамдықпен жүйіткіп үйреніп алған. Соның салдарынан бір көлік бұлт ете қалады да, бірнеше көлікті бүлдіреді. Мұндай жағдай «бетонкада» ғана емес, асфальт жолда да болады. Жол жүру ережесінде анық жазылған: ауа райы жағдайына қарау керек. Еуропада мұндай апат жиі болмайды. Өйткені онда жүргізушілер ереже сақтайды» деді Ұлан Әліпов.

Жұрт арасында «бетонка» атап кеткен жолдардағы мәселе биыл ғана басталған жоқ, жылда осылай. Жүргізушілер «жолды дер кезінде тазаламайды» деп «ҚазАвтоЖолды» кінәлайды, «ҚазАвтоЖол» болса, «қатты жүреді» деп жүргізушілердің өзін айыптайды.

Nege.kz порталы пікір сұраған Бағдат Әбенұлы Алматы – Талдықорған бағытында жиі жүреді. Ол «ҚазАвтоЖол» басшысының пікірімен келіспейді.

«Ұлан Әліпов «жүргізушілер мұзтайғақта 160-200 шақырым сағатына жүйткиді» деп асыра сілтеп жіберді. Қар жауған күннің ертеңінде қалыпты 100-110 шақырым жылдамдықпен жүру былай тұрсын, сағатына 50-60 шақырым басудың өзі мұң болады. Өйткені, жол тазаланбайды. «ҚазАвтоЖол» мекемесіне онсыз да аз ақша төлеп жүрген жоқпыз. «Қарды жолға түсірмей қағып ал» демейміз, табиғаттың төтен мінезіне ешкім қарсы келе алмайды. Тек жол уақтылы тазаланса, тұз араласқан құм дер кезінде себілсе, бізде де жол апаты азаяды», – дейді Бағдат Әбенұлы.