«Қазақтелеком» қазақша сөйлейді

Компания 2023 жылды «Сервис жылы» деп жариялап, соның аясында Алматы, Астана қалаларында «Мен қазақша сөйлеймін» атты ауқымды іс-шара өткізді. Мұндағы мақсат – қазақ тілінде қызмет көрсету сапасын арттыру, әріптестер арасында және сыртқы ортамен байланыста мемлекеттік тілді негізгі коммуникация құралы ретінде дәріптеу. 

«Компания мұндай нәтижелі жұмыстарды жүйелі түрде өткізіп тұрғаннан ұтпаса, ұтылмайды. Сондықтан алдағы 2024 жылы да осы форматтағы іс-шараларды еліміздің басқа аумақтарында да жалғастыруды жоспарлап отырмыз. «Қазақтелеком» басшылығы осындай игі іс-шараларға, бастамаларға әрі қарай да қолдау көрсете беретін болады», – деп атап өтті «Қазақтелеком» АҚ Басқарма Төрағасы Қуанышбек Есекеев.

Алматыда қыркүйек айында өткен шараларға 80-ге тарта қызметкер қатысса, желтоқсанда ұйымдастырылған Астанадағы шараға  60-тан астам компания қызметкері жұмылдырылды. 

«Қазіргі уақытта халық тарапынан қазақ тілінде қызмет алуға деген сұраныс күннен күнге артып келеді. Біздің компанияның халықпен тікелей жұмыс істейтін ұйым екенін ескерсек, бұл бағыттағы бізге қойылатын талаптар, міндеттер жүгі арта түсетіні түсінікті. Бұл жерде  мемлекеттік тіл саясатымен қатар, азаматтардың да ана тіліміздің дамуына деген оң көзқарасы, жеке жауапкершілігі маңызды рөл атқарады. Өткізіліп жатқан екі күндік шараның да негізгі мақсаты осы», – деп атап өтті қазылар алқасының төрағасы, «Қазақтелеком» АҚ Басқарма төрағасының кеңесшісі Сайлаухан Райымбеков.  

Шараның алғашқы күні Дана Рысмамбетованың басқаруындағы Ұйымдастыру-бақылау департаменті компанияның орталық аппараты және филиалдарынан келген клиенттерге, сондай-ақ сыртқы ортамен жұмыс істейтін қызметкерлерге арнайы семинар-тренинг өткізді. Соңында арнайы тапсырма алған қатысушылар көшеге, қоғамдық орындарға, сауда орталықтарына шығып, тұрғындардың қай тілде қызмет алатындығы, қазақша қызмет алуда қандай мәселеге тап болатынын сұрады. Тіпті, «Смартфондағы түрлі қосымшалар мен банкоматта таңдау тілі қандай?», «Қазақтелекомның мемлекеттік тілдегі ақпарат беру сапасына көңілі тола ма?» деген сауалнама жүргізіп, ролик әзірледі.   

Ал екінші күні командалар қызмет көрсету, жалпы жұмыс барысында туындайтын кикілжіңді дұрыс шешуге қатысты көрініс көрсетіп, компанияда қазақ тілін қалай трендке айналдыру туралы өз ұсыныс-пікірлерін ортаға салды. Компания ақпараттарындағы қазақша (аударма тілі емес) жарнамалық ұрандар, сонымен қатар қызмет көрсету саласында қолданылатын қазақ тіліндегі лексика-фразеологиялық және терминдік қорды меңгеруі тексерілді. Байқауға ҚР Ғылым және жоғары білім министрлігі Тіл саясаты комитетінің  өкілдері мен белгілі журналистер, тіл жанашырлары қазылық етті. 

Екі күндік іс-шараға жоғары баға берген ҚР ҒЖБМ Тіл саясаты комитеті Тіл саясатын іске асыру басқармасының басшысы Қайыржан Рақымжанов: «Сұрақтар, берілген тапсырмалар да ұшқыр, креатив екендеріңізді көрсете білді. Қазақтелеком ұжымының білікті мамандарымен танысқаныма қуаныштымын. Осылайша мемлекеттік тілдің дамуына өз үлестеріңізді қоса беріңіздер», – деген алғысын білдірсе, министрлік өкілдері тіл саясатына қатысты жүргізіп жатқан жұмыстар үшін «Қазақтелеком» ұжымына Алғысхат табыс етті.  

 «Соңғы жылдары жақсы үрдіс, жақсы тенденцияны байқаймыз. Қызмет көрсету орталықтарына хабарласқанда қазақ тілінде сапалы қызмет ала алатын болдық. «Қазақтелекомда» құжат айналымы 95 пайызға жетіпті, бұл өте жақсы көрсеткіш. Сол үшін және осындай ауқымды іс-шара ұйымдастырған компания басшылығына алғыс айтамын. Әрқайсымыз тіл сақшысы болып, мемлекеттік тілді дамытуымыз керек», – деді Қазылар алқасының мүшесі, тележүргізуші, ақын Назира Бердалы жылы лебізін жеткізіп. 

Осылайша, «Қазақтелеком» ұжымы мемлекеттік тілді білу деңгейін көрсетіп қана қоймай, компанияда мемлекеттік тілдің қолданыс аясын әрі қарай дамытудың жаңа, тың жолдарын ұсынды. Осы істің басы-қасында жүрген Ұйымдастыру-бақылау департаменті игі шараны өткізуді дәстүрге айналдырмақ.