«Жеке деректер медициналық ұйымдар арқылы қолды болған» – Денсаулық сақтау министрлігі не дейді?
Жақында «16 миллион қазақстандықтың жеке деректері желіде тарап кетті» деген ақпарат тарады. Қазір осыфакті бойынша Қылмыстық кодекстің 208-бабына сәйкес, Ұлттық қауіпсіздік комитеті сотқа дейінгі тергеп-тексеру амалдарын жүргізіп жатыр.
Бұған дейін Премьер-министр Олжас Бектенов «алдын ала мәлімет бойынша, жеке деректер медициналық ұйымдар арқылы тарап кетуі мүмкін» деп мәлімдеген.
«Бұл – өте өкінішті жағдай. Мұндай фактілердің болуы Үкіметке де абырой әкелмейді. Бірақ тексеруші органдардың алдын-ала тұжырымдары бойынша деректер медициналық ұйымдардан тараған болуы мүмкін. Өйткені олар мемлекеттік дерекқорларға қол жеткізе алады. Бірақ оларды ұрлықтан сақтай алмайды. Тиісті жауапкершілік бар», – деген еді Бектенов.
Премьер-министр бұған жол берген жауапты адамдардың қылмыстық жауапкершілікке тартылатынын атап өткен-ді.
Азаматтардың жеке деректері медициналық ұйымдардан қандай жағдайда тарап кеткен? Орталық коммуникациялар қызметінің баспасөз конференциясы барысында NEGE тілшісі жолдаған сауалға ҚР Денсаулық сақтау вице-министрі Ержан НҰРЛЫБАЕВ жауап берді.
«Аталған мәселеге қатысты қазір Премьер-Министрдің тапсырмасы бойынша құқық қорғау органдары тексеру жүргізіп жатыр. Тексеру нәтижесі бойынша қоғамға толық ақпарат беріледі. Сондай-ақ, деректердің таралу көзі нақты анықталатын болады», – деп қысқа қайырды Ержан Нұрлыбаев.
ҚР Денсаулық сақтау вице-министрі жеке деректердің қандай жағдайда және нендей мақсатта тарап кетуі мүмкін екенін ашып айтпады.