Қазақстандық жеңіл атлеттер жасөспірімдер арасындағы Азия чемпионатында алты медаль жеңіп алды
Даммам қаласында (Сауд Арабиясы) жеңіл атлетикадан жасөспірімдер арасындағы Азия чемпионаты өз мәресіне жетті. Бұл жарыста Қазақстан құрамасы алты медаль жеңіп алды.
Алматы, NEGE. Команданың қоржынында бір алтын медаль бар. Оны Полина Кузубова (жетісайыс) жеңіп алды. Онсайыста Асқар Өмірзақ екінші орынға ие болды.
Қола жүлдені Асылзат Қыдырбай (жетісайыс), Дмитрий Шкердин (сырықпен секіру), Эвелина Рябкова және Кирилл Савченко (екеуі де 400 метрге кедергілер арқылы жүгіру) жеңіп алды.
Медальдар кестесінде Қазақстан құрамасы оныншы орынға тұрақтады. Бірінші орынды Қытай иеленсе, екінші орын Өзбекстан командасына бұйырды, ал Жапония үздік үштікті түйіндеді.