Қазақстанда іздеуде жүрген 12 адам ұсталды
Көліктегі полиция департаменті жүргізген "Құқықтық тәртіп" жедел-профилактикалық іс-шарасы кезінде іздеуде жүрген оннан астам күдікті ұсталған.
Астана, NEGE. Ішкі істер министрлігінің мәліметінше, 11-13 желтоқсан аралығында көлік полицейлері 13 қылмыс пен қылмыстық теріс қылықты тіркеген.
«Тәртіп сақшыларының жедел әрі үйлесімді әрекеттерінің нәтижесінде олардың 12-сі "ізін суытпай" ашылды. Жедел-іздестіру шаралары аясында іздеуде жүрген 12 адам ұсталды», – делінген ІІМ хабарламасында.
Іс-шара кезінде әкімшілік құқықбұзушылықтарды анықтауға және олардың жолын кесуге ерекше назар аударылған.
«Нәтижесінде 1245 азамат жауапкершілікке тартылды. Ең көп тіркелген құқықбұзушылықтар: қоғамдық орындарда тиісу – 108 факті, сондай-ақ алкогольдік ішімдіктерді ішу және қоғамдық орындарға мас күйінде келу – 96 факті. Сонымен қатар түнгі уақытта көлік нысандарында заңды өкілдерінің еріп жүруінсіз болған 24 кәмелетке толмаған бала анықталды. Олардың 14-і кәмелетке толмағандарды бейімдеу орталығына орналастырылды», – деп хабарлады ведомство өкілдері.
Іс-шара барысында көші-қон заңнамасын бұзу деректері де анықталып, 49 шетел азаматы әкімшілік жауапкершілікке тартылғаны мәлім болды.