Қазақстанда Өзбекстанның танымал блогеріне халықаралық іздеу жарияланды
26 жастағы Махмуд Хикматов «SultanGames», «PINCO», «Nomadcasino», «Pin-Up», «Vavada» және басқа да заңсыз интернет-казиноларды жарнамалап, насихаттады деген күдікке ілінді.
Астана, NEGE. Бұл жөнінде Қазақстанның Қаржы мониторингі агенттігі хабарлады.
Агенттік ақпаратынша, Қазақстан аумағында интернет-казинолардың заңсыз жұмыс істеуіне мүмкіндік беретін жүйе құрылған. Осы жүйе арқылы интернет-казино интерфейсі ұсынылып, ақша қабылдау және төлем жасау жолға қойылған. Ол үшін эквайринг, мобильді төлемдер мен криптовалюта пайдаланылған. Сондай-ақ ел азаматтарын құмар ойындарға жаппай тарту мақсатында жарнама таратылған.
«Интернет-казиноларды жарнамалау үшін ұйымдастырушылар блогер Махмуд Хикматовты тартқан. Оған Қазақстанда жұмыс істейтін инфлюенсерлерді тауып, солар арқылы жарнамалық материалдар жариялату міндеті жүктелген», – делінген хабарламада.
Хикматов блогерлерден әлеуметтік желідегі парақшаларының статистикасын, соның ішінде жазылушыларының демографиялық және географиялық көрсеткіштерін, сондай-ақ жарияланымдарының қанша адамды қамтитыны туралы мәліметтерді сұратқан. Жарнама құны осы деректерге қарай белгіленген.
«Ол барлығы 35-тен астам блогерді, оның ішінде блогер Қайсар Қамзаны тартқан», – делінген хабарламада.
Сот Махмуд Хикматовты қамауда алуға санкция берді.
Еске салайық, қазақстандық блогер Қайсар Қамза биылғы 6 тамызда Вьетнамнан экстрадицияланды.
Қайсар Қамза, ҚМА өкілдерінің мәліметінше, интернет-казиноларға апаратын рефералдық сілтемелерді жариялап, Қазақстан азаматтарын тыйым салынған құмар ойындарға әдейі тартқан. Ол сілтеме арқылы өткен әрбір пайдаланушы үшін сыйақы алып отырған.