Қазақстанда «Бір жігітке сегіз қыздан келетіні» қаншалықты рас?
Қазақстандағы демографиялық деректер ел ішінде жиі айтылатын «бір жігітке сегіз қыздан келеді» деген пікірдің нақты статистикамен сәйкес келмейтінін көрсетті.
Астана, NEGE. Қазақстанда халық саны 20 500 000-ға жуықтады. Nofake.kz дерегінше, елдегі әйелдердің жалпы саны 10 488 074 адамды құрайды. Бұл жалпы халықтың шамамен 50%-ы. Яғни, демографиялық құрылымда әйелдер мен ерлер саны шамалас деңгейде.
Жас құрылымына тоқталсақ, елдегі нәзік жандылардың орташа жасы – 34,1 жас. 16–60 жас аралығындағы азаматшалар жалпы көрсеткіштің шамамен 55%-ын құрайды. Ал 15 жасқа дейінгі қыз балалардың үлесі 29% болса, 61 жастан асқандардың үлесі 15%-ға жуық.
Өңірлік бөлініске көз жүгіртсек, қыз-келіншектер көбіне Астана мен Алматы қалаларында шоғырланған. Бұдан бөлек, Түркістан және Алматы облыстарында тұратын нәзік жандардың саны да өзге өңірлермен салыстырғанда жоғары. Қазақстандағы әйел қауымының өмір сүру ұзақтығы 79,4 жылды құрайды.
Еңбек нарығында да олардың үлесі айтарлықтай көп. Жұмыспен қамтылған қыз-келіншектердің үлесі 48% немесе шамамен 4,4 млн адам. Жалдамалы қызметкерлер арасында бұл көрсеткіш 50%-ға тең болса, өз бетінше еңбек ететіндердің арасында 45% шамасында.
Әйелдердің ең көп еңбек ететін салалар да белгілі. Басым бөлігі білім беру жүйесінде қызмет атқарса, 19% сауда саласында жұмыс істейді. Ал, 10%-ы денсаулық сақтау саласында еңбек етеді. Кәсіпкерлік ортада да олардың белсенділігі жоғары. Жеке кәсіпкерлер арасында нәзік жандардың үлесі 50,8%-ға жеткен.
