12 февраля 2026 г. 16:25
Қарағандыда ауруханада науқастарға құрттап кеткен тамақ берген
Желіде Қарағанды облыстық жұқпалы аурулар ауруханасында науқастарға құрттап кеткен тамақ берілгені туралы ақпарат тарады.
Астана, NEGE. Облыстық денсаулық сақтау басқармасының мәлімдеуінше, ауруханада ас әзірлейтін бөлім жоқ, сондықтан науқастарға тағамдарды жеке компания жеткізіп тұрады.
«10 ақпанда тағамнан жәндік табылды. Сол сәттен кейін дереу шаралар қабылданды: оқиға тексерілді, оған жеткізушінің өкілі қатысты, тәуліктік тамақ партиясы толық ауыстырылды, ақау актісі толтырылды», – делінген хабарламада.
Жеткізушіге шағым хат жолданған. Сонымен қатар мемлекеттік орган бұл жағдайды санитарлық-эпидемиологиялық бақылау басқармасына хабарлаған. Қазіргі уақытта компанияға қатысты тексеру жүргізіліп жатыр.
