Қайрат Нұртас пен Мейрамбек Беспаевтың концерті АҚШ-та дауға айналды
АҚШ-та да бір қауым қазақ тұрады. Ара-тұра қазақ эстрадасының маңдайалды әншілері мұхит асып, концерт беріп жүргені белгілі. Олардың қатарында Қайрат Нұртас, Мейрамбек Бесбаев, Ғазизхан Шекербек бар.
- Тақырыпқа орай: Мейрамбек Беспаев АҚШ-та концерт береді
Алайда, осы өткен концерттер аясында АҚШ-тағы қазақтар арасында дау туындаған сияқты. Инстаграм әлеуметтік желісіне видео жазба жариялаған Мақсат Фахрутдинов: «Қайрат Нұртас, Мейрамбек Беспаев берген концерт аясында дау болып жатқаны рас. Қайрат Нұртастың концертін мен ұйымдастырып, өткіздім. Бірақ шақырған – Данияр Қожан. Ол әншілер келмей тұрып менен көмек ретінде 10 мың АҚШ долларын сұрады. Бердім. Одан кейін әр қалаға 10 мың доллар керек болып жатыр. Әйтпесе, әншілер көнбей жатыр. Бермесек, сахнаға шықпайды», – деді.
Елге, бәріне айтып қойғанбыз. Қайрат Нұртастың концерті бес күнде ұйымдастырылды. Сосын 10 мың доллардан үш қалаға 30 мың доллар, оған қосымша қонақ үй, тамағы, әрі-бері ұшқанына, жүрген көлігіне ақша төледім. 32 800 доллар менің қалтамнан шықты. Жіберілген ақша бәрі телефондағы қосымшада, қағазда тұр. Одан бөлек Қайратқа осында тұратын Тұрапбек деген қырғыз ағайын IPhone смартфонын, ноутбук және 3 мың доллар қолма-қол ақша берді.
Қайрат Нұртасты Огайо штатында тойға шақырған. Оған өзім апардым. Олар да 7 мың доллар берді. Қайрат Нұртастың анасы Гүлзира ханымнан «Данияр Қожанның қолына 40 мың АҚШ доллары берілді. Сіз алдыңыз ба?», – деп едім, «Бүкіл АҚШ-тан 10 мың долларға жетер-жетпес ақша алып кеттім» деді.
Содан Даниярға «Мен берген, жұрт берген ақша қайда?» деп едім, «келесі әншілер келгенде беремін» деп шықты. Ол аздай, туыстарыма виза жасап беретін болып тағы да 5 мың 500 доллар алды. Виза да жоқ, ақша да жоқ», – дейді бейнежолдауда.
«Өткенде әнші ағамыз Мейрамбек Беспаевты шақырды. Данияр Қожан Нью-Йорк пен Филадельфияда тұратын қазақтар арасында дау-дамай туғызды. Біз Филадельфияда концерт ұйымдастырсақ, ол Нью-Йоркте елден ақша алып, тегін концерт ашып жібереді. Оған жергілікті қазақтар 13 500 АҚШ долларын төлеген. Ал менен 5 мың доллар шықты. Сол сияқты Орландо штатында 70 шақты қазақ жиналып Мейрамбек ағаны күтеді. «Бізге неге келмедіңдер?» деп Даниярға хабарласса, ол: «10 мың доллар бермесеңдер, бармаймыз!» деген. Ал олардың қолында тек 7 мың доллар ғана болған. Осылайша, бұл штатқа да бармай қойды», – деп аяқтайды пікірін Мақсат Фахрутдинов.
Бұрнағы күні «Мейрамбек Беспаев пен Қайрат Нұртас АҚШ-тағы қазақтарды алдап кетті» деген видео жарияланған. Алайда қазақ әншілерінің шақырған жерге бармай қалуының себебі ұйымдастырушылардың арасындағы алауыздықтан болуы әбден мүмкін.
Білуімізше, Мақсат кәсіпкерлікпен айналысады. «Mask transportation» компаниясының жетекшісі. Мақсат та, Данияр да қазақ әншілерінің АҚШ-та өтетін концертін ұйымдастырушы. АҚШ-та тұратын екі қазақ жігіті неге келіспей қалды? Мақсат Фахрутдинов айтқан мәлімет рас па?
Nege.kz тілшісі бұдан соң Нью-Йоркте тұратын Данияр Қожанға хабарласты.
«Мәдениет және спорт министрлігінің АҚШ-тағы штаттан тыс амбассадорымын. Арнайы куәлігі бар. Бірақ мемлекеттік қызметке жатпайды. 16 жасымнан бастап осындай шаралар ұйымдастырып келемін. Мен ақша үшін ұйымдастырмаймын. Мақсатым – қазақтардың басын қосу. Нью-Йорк қаласында қазақ радиосын аштым.
Бейнежолдауды көрдім. Бәрі өтірік. Маған басында басқа әңгіме айтқан. Енді видеода басқаша айтып отыр. Менің алғанымды дәлелдейтін чегін көрсетсін. Әр қаладан 10 мың доллар алды дегені – жалған. Бұл жерде тек көреалмаушылық.
Бір-бірімізді қолдаудың орнына осылай артқа тартамыз. Мейрамбек аға да, Гүлзира әпке де Мақсатқа ренжіп отыр. Енді мені қазақтардың барлық тобынан өшіріп тастады. Тіпті, жауап жазуға мүмкіндік бермеді», – дейді Данияр Қожан.
Ал бейнежолдауды тыңдаған соң әнші Қайрат Нұртастың продюсері әрі анасы Гүлзира Айдарбекова: «Мақсат, өткен нәрсені неге қозғап жатырсың? Мен түсінбей тұрмын. Сол жақта жүрген азғантай қазақ бір-біріңнің еттеріңді жемесеңдер болмай ма? Сен қолма-қол ақша беретін болсаң, осыншама ақша шығардым» деп айтатын едің ғой. Сосын қырғыздардың берген сыйлығында не жұмыстарың бар? Ұялы телефон, басқасын тікелей өзімізге берді. Қырғыздар берсе, «алмақтың да салмағы бар», Қайрат өзі жақсылығын басқалай жасайды. Ол – сыйлық. Сосын тойдың ақшасын да иесі өзі әкеп берді. Бастысы, біз ырза болып кеттік қой. Сен қолыңнан шықпаған ақшаны шығардым деп тұрсың ғой мына жерде», – деп жауап берген.
Мәселенің мән-жайын білмек үшін тілшіміз халықтың сүйікті әншісі Мейрамбек Беспаевқа сұрақтар жіберген. Алайда әнші жауап бермеді.
