Инстаграмның танымал жұлдыздары кімдер?

Спорт жұлдызына айналған Криштиану Роналду оқырман саны 200 миллионға жеткені үшін, әлеуметтік желі арқылы көпшілікке алғысын білдірген еді. Небәрі 2 аптаның ішінде оның фалловерлер саны 2 миллионға артқан. Осы уақытқа дейін бұл көрсеткішке шоу-бизнес өкілдері қол жеткізе алмады.

Әйгілі футболшыға деген оқырман қызығушылығының артуына оның сүйіктісі - Джорджина Родригес септігін тигізген көрінеді. Роналдудың ғашығының кезінде қарапайым дүкен сатушысы болғаны көптің назарын аударған. Сонымен қатар Криштианудың жиі жариялайтын жанұялық суреттері үнемі ел назарында.

Ариана Гранде де көп ұзамай Роналдудың рекордын басып озбақ ниетте. Алайда, әнші ару әзірге 174 миллион оқырманымен, екінші орынды місе тұтып отыр. Желі қолданушыларының арасында Ариананың танымалдылығының шарықтауына оның хит тректері себеп болған. Одан бөлек, өнер иесінің инстаграм парақшасымен айналысатын тұтастай командасы бар көрінеді.

2018 жылы Голливудтың ең табысты актеры атанған Дуэйн Джонсон қалың әмиянымен ғана емес, желідегі оқырман санымен де мақтана алады. Мінсіз мүсінді серінің инстаграм парақшасына 171 миллион фалловер жазылған.

Оқырманның көптігі табыстың оңай түрі десек, артық айтқандық емес. Сондықтан кейбір өнер өкілдері фалловерлерінің көптігін пайдаланып, қалтасын қалыңдатып жүр.