ФИФА президенті Қазақстанға келеді
Былтыр күзде ФИФА-ның Париж (Франция) қаласындағы еуропалық кеңсесіндегі Джанни Инфантиномен кездесуде қазақстандық делегация еліміздегі бұқаралық футболды дамыту жобасын ұсынған болатын.
Бұл туралы inbusiness.kz хабарлады.
Алматы, NEGE. Қазақстан футбол федерациясының президенті Әділет Барменқұловтың шақыруымен Халықаралық футбол федерациялары қауымдастығының басшысы (ФИФА) Джанни Инфантино Астанаға арнайы келеді.
Ресми сапар 3 мамырға жоспарланған. Былтыр күзде Әділет Барменқұлов пен Джанни Инфантино Франция астанасы Парижде кездесу өткізіп, футболды дамытуды кеңінен насихаттап, дайындық жүйесі мен жарыстарды ұйымдастыру, сонымен қатар Қазақстанда футбол инфрақұрылымын жақсарту тақырыптарын талқылаған еді.
Халықаралық футбол федерациялары қауымдастығы басшысының Қазақстанға сапары аясында ел аумағында ФИФА қызметін дамыту бойынша халықаралық іс-шараларды ұйымдастыру мәселелерін талқылап, сонымен қатар Орталық Азия футбол қауымдастықтары арасында ынтымақтастықты арттыру алға қойылмақ.
Джанни Инфантино үшін Халықаралық футбол федерациясының басшысы қызметінде Қазақстанға алғашқы сапары болмақ.