Еуропалық алаяқтықпен күрес бюросы Қазақстаннан жеткізілетін өнімдерді тексеріп жатыр
Еуропалық алаяқтықпен күрес бюросы (OLAF) Еуроодақ нарығына жеткізілетін құс мамығы мен қауырсыны және жануарлар немесе өсімдік майларына қатысты тексеруді бастады.
Астана, NEGE. Тексерудің жай-жапсарын талқылау үшін сауда және интеграция вице-министрі Жанель Кушукова мен OLAF басшысы Петр Клемент Брюссельде кездесті.
Министрліктің хабарлауынша, кездесу барысында OLAF өкілдері тергеп-тексеру барысы туралы ақпарат берді. Ал қазақстандық тарап аталған өнімді өндіруші қазақстандық кәсіпкерлер, жүзеге асырылып жатқан өндірістік бағдарламалар және кәсіпорындардың Еуропалық одақ нарығына экспортты жалғастыруға мүдделілігі жөнінде баяндап, бұл тұрғыдағы Қазақстанның ұстанымын жеткізді.
Сондай-ақ қазақстандық делегация OLAF өкілдерін Қазақстан Республикасына келіп, жүргізіліп жатқан тергеп-тексеру аясында кәсіпорындардың жұмысымен танысуға шақырды.
Алайда Сауда және интеграция министрлігі еуропалық мамандардың қандай заңбұзушылықтарға күдік келтіріп отырғанын нақтылаған жоқ. Сондай-ақ тергеу қандай компанияларға қатысты жүргізіліп жатқаны да белгісіз.