Еуроодақта Temu-дан сатып алатын зат қымбаттайды
Еуроодақ билігі шетелден келетін барлық сәлемдемелерге, құнына қарамастан, кедендік баж енгізу туралы шешім қабылдады.
2026 жылғы 1 шілдеден бастап ЕО аумағына әкелінетін әрбір сәлемдеме үшін 3 еуро көлемінде тұрақты алым төлеу қажет болады. Сарапшылардың бағалауынша, соның салдарынан Temu, AliExpress және Shein сияқты платформалардан келетін арзан тауарлардың бағасы 10–50%-ға дейін өсуі мүмкін. Ең қатты қымбаттайтыны – ең арзан позициялар. Бұдан бөлек Еурокомиссия қытайлық маркетплейстерден әкелінетін тауарлардың сапасына бақылауды күшейтуді жоспарлап отыр, деп жазады AroundPrague.cz порталы.
Аталған шаралар Қытайдан келетін арзан әрі сапасыз тауарлардың Еуропа нарығына ағымын азайтуға, сондай-ақ жергілікті ритейлерлерді қорғауға бағытталған. Олар Қытайдың ірі сауда платформаларымен адал бәсекелесу мүмкін емес екеніне шағымданған.
Айта кетейік, қазақстандық ритейлерлер де бұрын қытайлық маркетплейстерге қатысты шағымдар айтқан. Олардың қатарында: қытайлық тараптың баға демпингі, шамадан тыс жарнама, жеке деректерді пайдалану ашықтығының болмауы жөніндегі күдік және қазақстандық креаторлардың патенттелген дизайндарын көшіру бар.
Қазақстанда қытайлық маркетплейстер тарапынан әділетсіз бәсекелестік туралы мәселе көтерілгеннен кейін, билік шетелден келетін құны 200 еуродан асатын сәлемдемелерге 5% мөлшерінде баж және қолданыстағы мөлшерлеме бойынша ҚҚС енгізу туралы шешім қабылдады. Бұл ережелер 2026 жылғы 1 шілдеден бастап күшіне енеді.
Алайда құны 200 еуроға дейін және салмағы 31 келіге дейінгі, соның ішінде Temu-ден келетін тауарлар үшін бажсыз әкелу шегі әлі де сақталып отыр. Бұл жағдай түптеп келгенде Қазақстан экономикасына кері әсер етіп, бюджетке түсетін салықтардың азаюына әкелуі мүмкін.
Сонымен қатар, «Қазпошта» АҚ мәліметінше, шетелдік интернет-алаңдардан жеке тұлғалар сатып алатын тауарлардың 90%-дан астамы 200 еуро шегінен аспайды.
