Ералы Тоғжанов эпидахуалды тексеру үшін Атырау облысына барды

Алматы, NEGE. Бұл жөнінде COVID-19 таралуына жол бермеу жөніндегі ведомствоаралық комиссия хабарлайды. Жұмыс сапары аясында «СК-Фармация» ЖШС қоймалары тексеріліп, медициналық мекемелердің бір айлық тұрақты қормен қамтамасыз етілуі тексерілді. Қазіргі кезде аталған мекемелерді дәрі-дәрмекпен қамту жолға қойылған. Атап айтсақ, «СК-Фармация» апта сайын 338 түрлі препарат жеткізіп келеді. Бұның сыртында облыстың дәріханаларына да соңғы екі апта ішінде 80 тонна дәрі-дәрмек әкелінген. Негізгі медикаменттер бойынша облыстың барлық медициналық мекемелерінде бір айлық қор бар, алайда қажетті сегіз дәрі бойынша қор бір аптаға ғана жетеді.

«СК-Фармация» ЖШС Басқарма төрағасы Е.Искалиев аталған мәселені үш күннің ішінде шешуге дайын екенін жеткізді. Премьер-министрдің орынбасары «СК-Фармация» компаниясына облыс әкімдігімен бірлесе отырып, үш айлық медикамент қорын қалыптастыру үшін өтініш беру жұмыстарын жүргізуді тапсырды. Облыстағы эпидемиологиялық ахуалды одан ары тұрақтандыру мақсатында шұғыл шешідер қабылдау үшін жиын өткізілді. Жиын соңында медициналық мекемелерді өкпені жасанды желдету аппараттарымен және оттегі концентраттарымен толық жабдықтау үшін нақты шешім жолдары әзірленіп, протоколдық тапсырмалар қабылданды. Сонымен қатар Ералы Тоғжанов түсіндіру жұмыстарын күшейтуді жалғастырып, халық санитарлық нормаларды сақтауға баса мән беру керектігін атап өтті.

Премьер-министрдің орынбасары Ералы Тоғжанов өңірге сапары аясында COVID-19-ға арналған инфекциялық станционар ретінде жұмыс істеп жатқан Атырау облыстық №2 ауруханасына да барды. Онда барлығы 1557 адам коронавирус инфекциясымен түсіп, олардың 1386-сы жазылып шыққан. Облыста қазіргі кезде инфекциялық науқасы барларға арналған орындар 60 процентке артқан. Ал шілде айының басынан бері аталған орындар 83 проценттен 61,7 процентке дейін босаған. Қосымша сапалы медициналық көмек көрсететін тәулік бойы жұмыс істейтін колл-орталық ұйымдастыру арқылы жедел жәрдемге түсетін қоңыраулар 1300-ден 700-ге дейін азайған. Күн сайын рейд өткізетін 114 мониторингтік топ 563 бұзушылықты анықтап, 10 миллион теңгеден астам соманың айыппұлы салынған. Еске сала кетейік, үкіметтік делегация бұған дейін жұмыс сапарымен Қызылорда және Маңғыстау облыстарында болды.