Ер адамдардың бір-бірін құшақтап, сүйіп амандасуы дұрыс емес – Тоқаев
Президент Қасым-Жомарт Тоқаев қоғамда жаңа жүріс-тұрыс әдебін, тазалық пен тәртіп мәдениетін дәріптеу қажет екенін айтты.
Астана, NEGE. Мемлекет басшысының пікірінше, Қазақстан халқы байырғы дәстүрлі құндылықтарға оралуы қажет.
«Ер адамдардың бір-бірін құшақтап, сүйіп амандасуы, сәлемдесу барысында әйелдердің еркектерді, еркектердің әйелдерді бетінен сүюі дұрыс емес. Біздің салт-дәстүрімізде мұндай ешқашан болмаған. Әсіресе, әскери форма кигендердің, генералдардың осылай істегені көзге оғаш көрінеді. Бұл не масқара? Кеңес Одағы маршалының, Дүниежүзілік соғыста, Ұлы Отан соғысында жеңіске жеткен маршалдардың осындай қылық көрсеткенін елестете аласыздар ма?», – дейді Қасым-Жомарт Тоқаев.
Оның айтуынша, еркектер қолының ұшын ұстата салмай, қолды қаттырақ қысып, сәл жымиып амандасуы керек. Ал сол адамды көргеніне қатты қуанған жағдайда, Президент оң қолды кеудесіне қойып амандасуға кеңес берді.