Ер адам азаматтық некедегі әйелін баласының көзінше пышақтап тастаған: Өзі 25-қабаттан секіріп, аман қалды
Астанадағы «Орбита» тұрғын үй кешенінде 36 жастағы азамат жанжал кезінде азаматтық некедегі әйеліне пышақ салып, артынша көпқабатты үйдің 25-қабатынан секіріп кеткен. Ол көлік үстіне құлап, тірі қалған.
Астана, NEGE. Қайғылы оқиға 19 маусым күні күндіз болған. Алдын ала мәлімет бойынша, пәтер ішіндегі жанжалды балалардың бірі көрген. 33 жастағы әйел оқиға орнында жан тапсырды. Оның 7 және 10 жастағы балалары анасыз қалды.
Бұл ақпаратты қалалық полиция департаменті растады.
«Адам өлтіру фактісі бойынша қылмыстық іс қозғалды. Алдын ала мәлімет бойынша, ерлі-зайыпты арасында жанжал туындап, оның барысында күйеуі әйелін пышақтаған. Кейін тұрғын үйдің 25-қабатынан секіріп кеткен. Ер адам ауыр жарақат алып, ауруханаға жеткізілді», – делінген хабарламада.
Қазір қайғылы жайттың мән-жайы анықталып жатыр, тексеру амалдары басталды.
Өзге ақпарат Қылмыстық-процестік кодекстің 201-бабына сәйкес жариялауға жатпайды.