ЕО-да Temu-ден келетін зат бағасы қымбаттайды
Еуроодақ билігі шетелден келетін сәлемдемелердің құнына қарамастан, кедендік алым алу туралы шешім қабылдады.
2026 жылғы 1 шілдеден бастап ЕО аумағына әкелінетін әрбір сәлемдеме үшін 3 еуро көлемінде тұрақты салық төлеу қажет болады. Соның нәтижесінде Temu, AliExpress және Shein платформаларынан алынатын арзан тауарлардың бағасы 10–50% аралығында өсуі мүмкін, дейді сарапшылар. Әсіресе ең арзан тауарлар қатты қымбаттайды. Сонымен қатар, Еурокомиссия Қытай маркетплейстерінен әкелінетін тауарлардың сапасына бақылауды күшейтуді жоспарлап отыр, деп жазады AroundPrague.cz порталы.
Бұл шаралар Еуропа нарығындағы Қытайдан келетін арзан әрі сапасыз өнім көлемін азайту, сондай-ақ аспан асты елінің сауда алпауыттарымен әділ бәсекеге түсе алмай отырған жергілікті ритейлерлерді қорғау үшін қажет екені атап өтілді.
Айта кетейік, бұған дейін қазақстандық ритейлерлер де қытайлық маркетплейстерге шағымданған. Шағымдар қатарында Қытай тарапынан баға демпингі, агрессивті жарнама, жеке деректерді пайдалану ашықтығының жоқтығына күдік және қазақстандық креаторлардың патенттелген дизайндарын көшіру мәселелері бар.
Қазақстанда да қытайлық маркетплейстер тарапынан әділетсіз бәсеке туралы айтыла бастағаннан кейін, билік шетелден құны 200 еуродан асатын сәлемдемелерге 5% баж салығы + қолданыстағы мөлшерлеме бойынша ҚҚС енгізу туралы шешім қабылдады. Бұл ереже 2026 жылғы 1 шілдеден бастап күшіне енеді.
Алайда шетелдік маркетплейстерден, соның ішінде Temu арқылы құны 200 еуроға дейін және салмағы 31 килограмға дейінгі тауарларды баж салығынсыз әкелу шегі әлі де сақталып отыр. Соның салдарынан бұл жағдай Қазақстан экономикасына кері әсер етіп, бюджетке түсетін салық көлемінің азаюына әкелуі мүмкін деген болжам бар.
Қазпочта АҚ мәліметінше, жеке тұлғалар шетелдік интернет-алаңдардан сатып алатын тауарлардың 90%-дан астамы 200 еуро шегінен аспайды.
