Эквадорда азаматтық соғыс басталды: Есірткі картельдері ел билігіне соғыс жариялады
Эквадорда азаматтық соғыс басталды. Есірткі картельдерінің бүлікшілері елді үрейлендіруде: олар TC Televisión телеарнасының тікелей эфирін жарылғыш заттармен басып алды, Гуаякил университетіне шабуыл жасады, көліктерді өртеп, көшеде жүрген адамдарды ұрлап жатыр.
Алматы, NEGE. Әлеуметтік желілерде жергілікті полиция мен әскери қызметкерлердің кепілге алынып, бастарына мылтық тақалғаны түсірілген видеолар тарады.
Президент Даниэль Нобоа төтенше жағдай жариялап, ішкі қарулы қақтығыс туралы жарлық шығарды.
Гуаякилдегі TC Television студиясынан түсірілген кадрлар бүкіл әлемге тарады. Бетперде киген қаскөйлер қолдан жасалған жарылғыш заттар мен гранаталарды пайдаланып, тележүргізушінің қалтасына бомба салған. Телекомпания қызметкерлерін үрей билеген. Бірнеше журналисті кепілге алды. Соңғы мәліметтерге қарағанда, полиция кепілдегілерді босатып, бірнеше қылмыскерді тұтқындады.
Журналист Бернарда Севаллостың айтуынша, шабуылшылар ғимаратқа жаңалықтар бағдарламасы басталардан он минут бұрын кірген.
Осы уақытта Гуаякил университетін де қарулы топ басып алған. Куәгерлердің айтуынша, қарақшылар бейбіт тұрғындарды қолға түсіріп, тонаумен айналысқан.
Атыс дыбысы Гуаякил метросында, тіпті Китодағы президент сарайының маңында да естілді.