ДСМ балаларға арналған «арзан вакциналарға» қатысты түсініктеме берді

Астана, NEGE. Министрліктің баспасөз қызметі бұл ақпарат шындыққа сәйкес келмейтінін мәлімдеді.

«Қазақстан Республикасында Ұлттық профилактикалық егулер күнтізбесі аясында қолданылатын барлық вакцина көпсатылы халықаралық және ұлттық сараптамадан өтеді, Дүниежүзілік денсаулық сақтау ұйымының талаптарына және ұлттық заңнамаға сәйкес тіркеуден өтіп, қолдануға рұқсат алады», – делінген министрлік хабарламасында.

Вакциналар бағасына емес, сапа, қауіпсіздік және тиімділік көрсеткіштеріне қарай сатып алынатынын атап өтті.

Ведомство өкілдерінің мәлімдеуінше, сатып алу барысында мынандай талаптар ескеріледі:

• ДДҰ-ның квалификация алды өтуі немесе қатаң реттеуші жүйесі бар елдерде тіркелуі;
• клиникалық зерттеулердің нәтижелері;
• өндірістік тиісті практика (GMP) халықаралық стандарттарына сәйкестігі;
• тіркеуден кейінгі қауіпсіздік мониторингінің деректері.

«Вакциналар "балалар арасында ауру туындатады" деген мәлімдемелердің ешқандай ғылыми дәлелі жоқ және көпжылдық халықаралық бақылау деректеріне қайшы келеді. Керісінше, вакцинация қауіпті жұқпалы аурулардан болатын сырқаттанушылық пен өлім-жітімді едәуір төмендетуге, мыңдаған ауыр асқынулар мен өлім жағдайларының алдын алуға мүмкіндік берді», – делінген хабарламада.

Денсаулық сақтау министрлігі жариялаған дерекке сүйенсек, соңғы 34 жылда Ұлттық иммундау саясатының арқасында эпидемиялық паротитпен сырқаттану деңгейі 100 еседен астамға төмендеген, вирусты А гепатиті 32 еседен аса, ал вирусты В гепатиті 92 есеге азайған.

Вакцинацияның арқасында балалар арасында қызылшамен сырқаттану 90%-дан астамға, қызамық пен паротит 95%-ға төмендеген. Полиомиелит 1996 жылдан, дифтерия 2009 жылдан бері тіркелмеген.

Министрлік медициналық білімі мен тиісті кәсіби құзыреті жоқ тұлғалардың мұндай мәлімдемелерді таратуы ата-аналардың денсаулық сақтау жүйесіне деген сенімді әлсірететінін және балалардың денсаулығына нақты қауіп төндіруі мүмкін екенін атап өтті.