Диабет пен ДЦП мемлекет қаржыландыратын аурулар тізімінен шығарылды

Астана, NEGE. Тізімнен қант диабеті, сал ауруы (ДЦП), ревматизм және дәнекер тіндердің жүйелік зақымданулары (аутоиммундық аурулар) алынып тасталды. Тізімге инсульттен кейінгі алғашқы жыл және эпилепсия енгізілді.

Бұдан бөлек, әлеуметтік маңызы бар аурулар қатарында туберкулез, ВИЧ, созылмалы вирусты гепатит пен бауыр циррозы, қатерлі ісіктер, психикалық аурулар, жедел миокард инфаркті, сирек (орфандық) аурулар және жүйке жүйесінің кейбір аурулары қалды.

Жаңартылған тізім 2026 жылғы 1 қаңтардан бастап күшіне енеді.

Айта кетейік, әлеуметтік маңызы бар аурулардың тізімі – міндетті медициналық сақтандыру аясында  мемлекет тарапынан қаржыландырылатын және қамтамасыз етілетін аурулар санаттарын анықтайтын құжат. Осы диагноздары бар науқастар дәрі-дәрмекпен қамтамасыз етіліп,  тексеруден өту және медициналық көмек қызметтерін тегін пайдалана алады.

2027 жылға қарай Денсаулық сақтау министрлігі сақтандыруға негізделген қаржыландыру үлгісіне көшуді жоспарлап отыр. Бұл модель бойынша шығындардың 35%-ы тегін медициналық көмектің кепілдік берілген көлеміне, ал 65%-ы МӘМС жүйесіне бөлінетін болады.