Дастархан басында қол алысып амандасу дұрыс па? Нұртөре Жүсіп пікір білдірді
Бұрынғы сенатор, қоғам қайраткері Нұртөре Жүсіп дастархан басындағы амандасу әдебіне қатысты пікір білдірді.
Астана, NEGE. Оның айтуынша, ас ішіп отырған адамдардың сырттан келген кісімен жаппай қол алысып амандасуы қазақтың ежелден келе жатқан дәстүріне жатпайды.
«Қазақта қалыптасқан жүйелі әдеп нормалары мен амандасу тәртібі бар. Алайда кейде соған мән бермей, ойланбастан әрекет жасап жатамыз. Ас ішіп отырған адаммен амандасудың да өз тәртібі болуы керек. Жұрттың дастархан басында жағалай қол алысқанын өз басым құптамаймын. Сырттан келген адамның қолын жуған-жумағаны белгісіз. Бұл – гигиена мәселесі», – деді Нұртөре Жүсіп Adyrna порталына берген сұхбатында.
Нұртөре Жүсіп міндетті түрде қол алысу немесе беттен сүйіп амандасу қазақтың төл салтына жатпайтынын айтты. Оның пікірінше, амандасқан кезде қолды жүрек тұсына қойып, бас изеу де жеткілікті.