Сатыбалды Үлкен Алматы өзенінің бойындағы гранит тақталардың ұрлығына қатысты пікір білдірді
«Орталық коммуникациялар қызметі» алаңында Алматы қаласының әкімі Дархан Сатыбалды брифинг өткізіп, журналистердің сауалдарына жауап берді.
Алматы, NEGE. Брифинг барысында журналистер Алматыдағы Үлкен Алматы өзенінің бойындағы гранит пен мәрмәр тақталардың ұрлануы туралы әкімге сұрақ қойды.
Сатыбалдының айтуынша, қазір қылмыстық іс жүргізіліп жатыр.
«Үлкен Алматы өзенінен тақтайшаларды ұрлап кеткен. Ол жердің барлығында тақтайша болмаған. Жоғарыдан төмен қарай түсерде 12 дана тақтайша ұрланған. Қазіргі таңда қылмыстық іс қозғалды. Ұрлаған адамдардың бәрі ұсталды. Қылмыстық іс аяқталмағандықтан, толық мәлімет айта алмаймын», – деді ол.
Үлкен Алматы каналын күрделі жөндеумен «Павлодарский речной порт» компаниясы айналысады. Журналистер бұл компания басқа жоба бойынша жұмыс мерзімін ұзақ созғанына қарамастан, оған осындай ірі жобаны қалайша сеніп тапсырғанын сұрады. Әкімнің айтуынша, мердігер конкурс арқылы таңдалады. Оны адам емес, компьютер өзі анықтайды.
«Павлодар речной порт» компаниясы гидротехника, бетон жасау бойынша алда. Сол себепті де ұтып кетеді. Оған біз тосқауыл қоя алмаймыз. Өйткені заң солай. Ұтса да жұмыстың сапасын сұрап отырмыз», – деді Алматы әкімі.
Бұған дейін Алматыдағы Баум тоғайында ағаштардың заңсыз кесілгені айтылған болатын. Журналистер бұл мәселеге қатысты әкімнің пікірін білді.
«Баум тоғайы тек әкімдіктің емес, Үкіметтің де қарауында. Ол жерде Аграрлық университет пен ауыл шаруашылығы министрлігіне қарайтын орман институты бар. Олар 2022 жылы зерттеу жүргізіп, Баум бағындағы ағаштарды тексеріп шыққан. Сол кездегі қорытындыға сәйкес, ағаштардың 10%-ы қураған. Қураған ағаштан ертеңгі күні ауру тарап, жанындағы сау ағаштарды бүлдіреді. Сол себепті нормаға сәйкес, кесу жұмыстары жүргізіледі», – деді Сатыбалды.
Алматы әкімі Баум тоғайының орнынан тұрғын үй кешені салынады деген қауесетті жоққа шығарды.
