DAR компаниясы білім беру курстарына 1000 грант бөледі
5Q.kz платформасына өтініш берген алғашқы 1000 адам DAR компаниясының бірегей 5Q әдістемесі негізінде әзірленген 6 курсқа қол жеткізе алады.
Алматы, NEGE. Платформаның beta-нұсқасында келесі курстар қолжетімді: Java тілінде бэкенд-программалау, NodeJS (QA) жүйесінде веб-қосымшаларды тестілеуді автоматтандыру, бизнесті сараптау, қазақ тілінде SMM және Excel курстарына кіріспе және қазақ тілін үйрену курсы. Сонымен қатар, платформадағы курстардың ауқымы үнемі толығып отырады.
“2016 жылдан бастап DAR компаниясы IT мамандықтары бойынша тағылымдамалық бағдарламаларды ұйымдастырып келеді. Бұл біздің компанияның және оның негізін қалаушы Алидар Өтемұратовтың құндылықтарының бір бөлігі – нарықта тәжірибемізбен бөлісу. Осы орайда біз бар күш-жігерімізді жетекші қызметкерлеріміздің білімі мен тәжірибесіне негізделген білім беру кеңістігін құруға бағыттаймыз. Аталмыш тағылымдамадан өту процесін кеңейтіп, көпшілікке арналған цифрлық дағдыны және IT машықтарын меңгеруге мүмкіндік беретін білім алу платформасын нарыққа шығарып отырмыз. Сіздердің әрқайсысыңыз осы платформаны, оқу процестерін жақсартуға үлес қосып, бізбен бірге табысқа жете аласыз”, - дейді DAR компаниясының басқарушы серіктесі Болат Садықұлов.
Курсқа қабылдану үшін үміткерлер 5q.kz сайтында 7-20 маусым аралығында өтініш қалдыруы қажет. Үміткер 15 жастан асқан Қазақстан Республикасының азаматы болуы тиіс.
Курстардың сипаттамасы
Backend программалау: Java
Курс жүйелердің ішкі мазмұны мен логикасын дамытатын программалаушыларды дайындауға бағытталған. Бұл мамандар әрқашан үлкен сұранысқа ие, өйткені олар ең көп таралған бағдарламалау тілдерінің бірі - Java арқылы күрделілігі жағынан алуан түрлі бағдарламаларды жасап, жаңарта алады. Java-да жұмыс істейтін мамандардың дағдылары мен машықтары айтарлықтай кең. Мәселен, олар қолданбалардың құрылымын құруға, программалық қамтамасыз етудің серверлік бөлігін құруға және көзге көрінбейтін веб-программалауды өңдеуге қатысады.
React тілінде WEB программалау
React Web Development курсы заманауи технологияларды, атап айтқанда React кодтар кітапханасын пайдалану арқылы веб-қосымшаларды жобалау және енгізуді оқытуға бағытталған.
Node JS платформасы, React, Angular, VueJS кітапханалары мен фреймворктары веб үшін программалық қамтамасыздандыруды бағдарламалау нарығында үлкен сұранысқа ие технологиялардың бірі болып табылады. Бұл курс React тілінде фронтенд программалау негіздерінен басталып, Typescript тілін пайдалану арқылы веб-қосымшаларды құру тәсілдері мен әдістерін де үйретеді.
NodeJS (QA) жүйесінде веб-қосымшаларды тестілеуді автоматтандыру
Курс барысында заманауи технологияларды пайдалана отырып, автоматтандырылған тестілерді әзірлеуді үйренесіз, кәсіби машықтарыңызды арттырасыз.
Бизнесті сараптау (бастапқы деңгей)
Курс осы саланы енді меңгеруді (junior) көздейтіндерге арналған. Бизнес сарапшы ретінде жұмыс істеуді бастау үшін келесі білім жиынтығын игерген абзал: бизнестің негізгі мақсатын, міндетін анықтай білу, бизнесті сараптау кезінде білім бағытын және нәтижелерін болжау; бизнес сарапшының кәсіби құзыреттері мен құралдарын игеру; бизнес-процестерді (BPMN), ұйымдық құрылымдар мен ақпараттық жүйелерді (UML) модельдеу құралдарын; талаптарды басқару негіздерін, техникалық құжаттаманы әзірлеу стандарттарын білу.
Қазақ тілінде Excel-ге кіріспе
Курс Excel бағдарламасынан еш хабары жоқ тыңдаушыларға бағытталған. Яғни курсты бастау үшін Excel-де жұмыс тәжірибесі болуы шарт емес. Сонымен қатар, курсқа Excel-де бастапқы білімі бар пайдаланушылар да қатыса алады. Олар өз кезегінде жаңа дағдыларға үйренеді. Курс 2 бөлімнен және 13 тақырыптан құрылған. Курс апта сайын қолданбалы режимде тапсырмаларды орындаумен ерекшеленеді.
SMM – қысқа да, нұсқа (бастапқы деңгей)
Курс барысында сіз SMM деген не, тапсырыс беруші тарапынан келетін бриф ақпаратты не үшін және қалай қолдануды меңгересіз. Нақты кейстерге сүйене отырып, цифрлық кеңістіктегі бәсекелестерді сараптауды, көрсеткіштер мен критерийлердің маңыздылығын арттыруды үйренесіз. Мазмұны тартымды контент-жоспар құрып, оның кімге бағытталғанын түсінесіз.
Қазақ тілі курсы
Курстың негізгі мақсаты – үйренушілердің қазақ тілін дамытуына, ауызекі тілді меңгеруіне көмектесу, сауатты жазу, оқуды толық қабылдау дағдыларын қалыптастыру, сондай-ақ оларды сауатты сөйлеуге, сауатты жазуға үйрету.