«Бұл масқара!» Қазақстандықтар интернет тарифінің өсуіне жаппай шағымданып жатыр

Астана, NEGE. Құзырлы органға жыл басынан бері азаматтардан байланыс тарифінің өсуіне қатысты шамамен 3 мыңға жуық шағым түскен. Өткен айда ірі байланыс операторлары интернет тарифінің қымбаттайтынын хабарлады. Содан бері жұртшылықтың наразылығы күшейе түсті. Beeline, Tele2/Altel және өзге провайдерлер тарифтерді бір жыл ішінде бірнеше рет көтергені үшін сынға ілікті. Оқырмандардың айтуынша, кей тарифтер бір жыл ішінде 2 есеге жуық қымбаттаған.

«Бастапқыда 2500 теңге төлейтінмін, қазір 5 мыңға жуық. Мұндай өсім тіпті азық-түлік дүкендерінде де жоқ», – деп жазады annmakarova есімді қолданушы.

«Айдың соңында жылдамдық төмендеді деген SMS міндетті түрде келеді. Tele2-ге ауысуды ойлап жүрмін», – дейді shake.ur.ass.

«Менің тарифімді 5990-нан 7990-ға көтерді», – дейді ekaterialibra.

«Tele2 баға көтермейді деп ойласаңыз — қателесесіз. Маған да 1000 теңгеге қымбаттайтыны жөнінде SMS келді», – деп жазады anastasia_gorbynova32.

Үй интернетінің құны да адамдардың қалтасына ауырлық салуда. Желі қолданушылары кей тарифтердің 18-20 мың теңгеге жеткенін жазып, наразылық білдіруде.

«Тарифке 22 мың теңге – бұл масқара», – деп ашынды katrina_domke.

БАЙЛАНЫС ОПЕРАТОРЛАРЫ БАҒАНЫҢ ӨСУІН НЕМЕН ТҮСІНДІРЕДІ?

Өзгерістердің себебін білу үшін байланыс операторларынан мән-жайды нақтыладық.

Beeline компаниясы тарифтерді 15–20% көтермек. Компания өкілдері бағалар нарықтағы орташа деңгейден төмен тарифтерге ғана әсер ететінін, ал абоненттерге өзгеріс 30 күн бұрын хабарланатынын мәлімдеді. Оператор соңғы жылдары желіні жаңарту шығындары артқанын айтады: тұтынушы трафигі 9 жылда 36 есе өскен.

Beeline-нің айтуынша, бір базалық станция құны 110 млн теңгеге дейін жетеді. ҚҚС өсімінің өзі компания шығынын 35 млрд теңгеге арттырған.

«Телекоммуникациялық жабдыққа, электр энергиясына және салықтарға төлемдерді жаңа тарифпен жүзеге асырамыз. Былтыр 6,5 млрд теңге төлеген болсақ, ҚҚС-ның жаңа мөлшерлемесі шығынды 35 млрд теңгеге арттырады. Нәтижесінде салаға инвестиция азайып, жаңа жабдық орнату мен қолданыстағысын жаңғырту қиынға соғады. Бұл байланыс сапасына әсер етіп, желі жүктемені көтере алмай қалады», – деп түсіндірді оператор. 

Tele2 тарифтердің қымбаттауын инфляциямен, салық өзгерістерімен және импорттық жабдық бағасының өсуімен байланыстырады. Компанияның айтуынша, ол шетелдік технологияларға тәуелді. Сондықтан желіні дамыту мен қызмет көрсету шығындары үнемі өсіп отырады.

Altel де 25 желтоқсаннан бастап тарифтер қайта қаралатынын ресми сайтында жариялаған. Оператор бұл желіні дамыту, жаңарту және техникалық қызмет көрсету шығындарының өсуі мен салық заңнамасындағы өзгерістерге байланысты деп түсіндірді.

«Абоненттік төлемді өзгерту бізге қызметтердің тұрақтылығын сақтап, одан әрі сапалы қызмет көрсетуге мүмкіндік береді», – делінген Altel хабарламасында.

МЕМЛЕКЕТ МОБИЛЬДІ БАЙЛАНЫС ТАРИФІН РЕТТЕЙ МЕ?

Әлеуметтік желілерде азаматтар бағаның өсуіне байланысты үкіметтен жауап талап етуде. Алайда Цифрлық даму министрлігінің телекоммуникациялар комитеті мобильді байланыс тарифтерін реттеу мемлекет құзыретіне кірмейтінін айтты.

Комитет тек жеке деректерді қорғау, мемлекеттік ақпараттық жүйелердің қауіпсіздігі және маңызды инфрақұрылым жұмысын ғана тексере алады. Ал тарифтер бұл тізімге жатпайды. Сондықтан министрлік операторлардан экономикалық есеп сұрай алмайды және бағаның неге көтерілгенін талап етуге құқылы емес.