Болат Мажағұлов 8 жыл 6 айға сотталды
Астанада мәдениет басқармасының бұрынғы басшысы Болат Мажагұлов пен мердігер ұйымның өкіліне қатысты сот үкімі шықты.
Астана, NEGE. Сот шешімімен мәдениет басқармасының экс-басшысы Болат Мажагұлов 8 жыл 6 айға сотталды.
Сот Болат Мажағұлов аса ірі көлемде бюджет қаражатын жымқырғаны үшін Қылмыстық кодекстің 189-бабының 4-бөлігі 2-тармағы (Сенiп тапсырылған бөтен мүлiктi иемденiп алу немесе талан-таражға салу) бойынша кінәлі деп танылды. Оған Есіл өзеніндегі "Күн" субұрқағының құрылысына бөлінген 1 миллиард теңгеден астам қаржыны жымқырды деген айып тағылған болатын.
Тергеу барысында белгілі болғандай, бұл жоба ешқандай мемлекеттік сатып алусыз, жобалық-сметалық құжаттамасыз, мемлекеттік сараптамадан өтпей салынған. Бұрынғы шенеуніктің құны 572 миллион теңгеден асатын мүлкі тәркіленді.
Іс бойынша тағы бір айыпталушы, мердігер ұйымның өкілі Мәди Қанапин 3 жыл алты айға бас бостандығынан айырылды. Сондай-ақ ол мемлекет қаржысын жымқыру (ҚК 189-бабының 4-бөлігі, 2-тармағы) және қылмыс жасауға жәрдемдесу (ҚР ҚК-нің 28-бабы 5-бөлігі) бойынша кінәлі деп танылды.
Сондай-ақ сот Мажағұлов пен Қанапиннен 1 миллиард 86 миллион теңге көлеміндегі шығынды өндіру туралы шешім шығарды.