Болашақта ақша аударуды ұмытатын боламыз. НЕГЕ?
.
Ranking.kz ақша аударымдарының халықаралық жүйесі бойынша Қазақстандағы аударым көлемінің бір жыл ішінде 39,9 пайызға төмендегенін жазады. Транзакциялар саны 17,6 пайызға азайып кеткен.
Қазақстандықтар бір рет ақша аударғанда орташа есеппен 180 мың теңге жібереді екен. Тіпті осы орта чек те мардымсыз болып қалған. Мысалы, бұл көрсеткіш 2018 жылмен салыстырғанда 27,1%-ға аз.
Ақша аударымдарының халықаралық жүйелерінің Қазақстандағы қолдану рейтингіне үңілсек, «Золотая Корона» бірінші орында келеді. Осы жүйе көмегімен ел азаматтары мен елде жүрген шетелдіктер 15,3 миллиард теңге аударған. Бұл жалпы аударымның 37,4 пайызын құрайды.
Екінші орында Faster жүйесі тұр. Ол арқылы 2,2 миллиард теңге өткен. Дегенмен, жалпы үлесі азайып келеді. Faster арқылы жүрген транзакциялардың саны 55 пайызға құлдыраған.
Әлемге әйгілі алпауыт Western Union елімізде тек үшінші сатыға әупірімдеп ілігіп отыр. Себебі, комиссиясы үлкен және оны қазақстандықтардың көпшілігі тиімсіз деп санайды. Western Union жүйесінен өткен аударым көлемі 2019 жылы 1,7 миллиард теңгені құрады. Бұл өткен жылмен салыстырғанда 25,6 пайызға аз.
Сарапшылар халықаралық ақша аударымдар жүйелері 5-6 жылдан кейін Қазақстаннан кетеді деген пікірде. Себебі, электронды әмияндар, финтех компаниялар, криптавалюталар дамыған сайын, ақша аудару комиссиясы азайып, бұл нарықта бәсекелестік күшеймек. Мультивалюталық банк карталары арқылы шет мемлекеттерге ақша аударуды смартфон арқылы да жүзеге асыруға болады. Сондықтан, аталған жүйелердің еліміздегі болашағы тұманды болып тұр.
