Биыл қанша қасқыр атуға болатыны анықталды
24 желтоқсанда Nege.kz порталында «Бұқар жырау ауданында бөрілер ауылды торуылдап жүр» деген мақала жарияланған. Мақалада Қарағанды облысында қасқырлар малға жан таптырмай жатқаны, тіпті бөрілердің ауылды торуылдай бастағаны айтылған еді. Жұрт құзырлы органдардан қасқыр атуға рұқсат беруін талап еткен. Осы мәселеге байланысты Экология, геология және табиғи ресурстар министрлігінің Орман шаруашылығы және жануарлар дүниесі комиетінің баспасөз хатшысы Сәкен Ділдахмет Nege.kz порталына жауап берді.
«Қасқыр мен шибөрінің санын реттеу үшін 2020 жылдың лимиті бекітілді. Мемлекеттік экологиялық сараптаманың қорытындысымен жыл сайын Республика аумағында қасқыр мен шибөрінің саны реттеліп отырады.
Қасқыр мен шибөрінің санын реттеуге рұқсат беру мемлекеттік қызмет көрсету болып саналады және оны облыстық орман шаруашылығы және жануарлар дүниесі инспекциясы электронды портал арқылы жүзеге асырады. Яғни кез келген аңшы электоронды портал (www.egov.kz) арқылы онлайн түрде өтініш бере алады. Егер интернет жоқ болса, халыққа қызмет көрсету орталықтарынан рұқсат алуға болады.
Қасқыр мен шибөрі – санын реттеп тұруға тиіс аңдардың санатына жатады. Халықтың денсаулығы үшін және ауыл шаруашылығы жануарларының ауру-сырқауына тосқауыл қою үшін қасқыр мен шибөрінің санына бақылау жасау қажет» деді С.Ділдәхмет.
Сонымен, 2020 жылы Қазақстан бойынша 4 824 қасқыр мен 11 733 шибөрі аулауға рұқсат етілді. Ең көп рұқсат Алматы облысына берілсе, Солтүстік Қазақстан облысына мүлдем рұқсат етілмеген. Төмендегі кестеде қай облысқа қанша қасқыр мен шибөрі аулауға рұқсат берілгені көрсетілген.
01.01.2020 – 31.12.20200 аралығында ҚР аумағында қасқыр санын реттеу лимиті
| Облыс | Рұқсат етілгені |
| Ақмола | 4 |
| Ақтөбе | 309 |
| Алматы | 1500 |
| Атырау | 903 |
| Шығыс Қазақстан | 510 |
| Жамбыл | 453 |
| Батыс Қазақстан | 57 |
| Қарағанды | 28 |
| Қостанай | 55 |
| Қызылорда | 432 |
| Маңғыстау | 276 |
| Павлодар | 21 |
| Солтүстік Қазақстан | 0 |
| Түркістан | 276 |
| Барлығы | 4 824 |
01.01.2020 – 31.12.2020 аралығында ҚР аумағында шибөрі санын реттеу лимиті
| Алматы | 1 000 |
| Жамбыл | 377 |
| Батыс Қазақстан | 6 |
| Қызылорда | 9 125 |
| Маңғыстау | 540 |
| Түркістан | 685 |
| Барлығы | 11 733 |