Биыл кең таралған екі банкнота айналымнан шығарылады
Ұлттық банк халық арасында кеңінен таралған 10 мың теңгелік банкнотаның айналымдағы мерзімі осы жазда аяқталатынын, алайда оны созу мүмкіндігі қарастырылып жатқанын хабарлады.
Астана, NEGE. Банк өкілдері «Сақ стилі» банкноталарының жаңа сериясын кезең-кезеңімен шығару жалғасып жатқанын еске салды. 2026 жылдың соңына шығару жоспарланған 20 мың теңгені есепке алмағанда, барлық номиналдағы банкноталар айналымға шығып болған.
Биыл номиналы 2 мың және 10 мың теңгелік банкноталар үшін айналымда қатар жүру кезеңі аяқталады:
- 10 мың теңге – 2024 жылғы 28 маусымнан 2026 жылғы 27 маусымға дейін;
- 2 мың теңге – 2024 жылғы 25 желтоқсаннан 2026 жылғы 24 маусымға дейін.
«Ұлттық банк 10 мың теңгелік банкноталардың айналымда қатар жүру мерзімін ұзарту мүмкіндігін қарастырып жатыр. Себебі ол банкноталар халық пен кәсіпкерлер арасында кеңінен таралған.
Оның үстіне, 2 мың мен 10 мың теңгелердің айналымда қатар болу уақыты бір мезгілде аяқталатындықтан, банк жүйесіне қосымша ауыртпалық салуы мүмкін. Сол себепті мерзімді ұзарту халық пен бизнеске ескі банкноталарды жаңасына біртіндеп әрі ыңғайға қарай ауыстыруға көмектеседі, сондай-ақ ескі үлгідегі банкноталардың табиғи тозуын қамтамасыз етеді», – делінген ресми хабарламада.
Мысалы, номиналы 5 мың теңгелік банкноталардың айналымда қатар жүру кезеңі 2023 жылғы желтоқсаннан 2025 жылғы қыркүйекке дейін созылғандықтан, халық пен бизнес ескі ақшаларды жаңасына еш кедергісіз ауыстыра алды. Банк дерегінше, бүгінгі таңда айналымда қалған ескі үлгідегі банкноталардың көлемі 1%-дан аз екен. Олар банктерге кейін де түсе береді, ал кейбір бөлігі жоғалып, сыртқа әкетілуіне немесе коллекция түрінде сақталуына байланысты қайтпауы да мүмкін.
«Жаңа және ескі үлгідегі банкноталар айналымда қатар болған кезеңде заңды төлем құралы болып қала береді, олар өз құнына сай Қазақстанның бүкіл аумағында төлемдер мен аударымдарда, банк шоттарына есептеуде қабылдауға жатады», – дейді Банк өкілдері.
Бұл ретте банк мамандары айналымдағы қатарлас кезең аяқталған соң да барлық банк пен «Қазпошта» АҚ ескі үлгідегі банкноталарды жаңа үлгідегі ақшаларға тағы 3 жыл бойы, ал Ұлттық банктің филиалдары мерзімсіз айырбастайтынын еске салып өтті.
