Байханов: Балаларды ғана емес, мысығымды да жақсы көремін
Павлодар облысының дамуына арналған брифингте өңір басшысы Асайын Байханов білім басқармасы мен «Кео» жеке мектебі арасындағы дау жөніндегі сұраққа жауап берді. Бұған дейін мектеп директоры Елена Кисанова білім беру ұйымы мемлекеттік тапсырыстан заңсыз шеттетілді деп мәлімдеген еді.
Астана, NEGE. Журналист Ботагөз Омарова балаларды мектептер мен мәдениет үйлеріне кіргізбей қойғанын өз көзімен көргенін айтты. Соның салдарынан олар сабақты далада оқуға мәжбүр болған.
«Мүмкін сіз балаларды жақсы көрмейтін шығарсыз?» – деп сұрады журналист әкімнен.
Бұған жауап ретінде Асайын Байханов өзінің төрт баласы бар екенін айтып, «мен балаларды ғана емес, тіпті мысығымды да жақсы көремін» деді.
Сондай-ақ өңір басшысы әкімдіктің ұстанымын түсіндіріп берді. Оның айтуынша, мемлекеттік тапсырыс аясында 3300 орын қарастырылған, сол кезеңде соның 1132-сі ғана бөлінген. Кисанованың компаниясы 363 орын жеңіп алған, бұл шамамен 32 пайызға тең. Байқауға барлығы 69 жеткізуші қатысқан.
Байханов бір ғана кәсіпкердің өтінішімен конкурс қорытындыларын жою қалғандарының наразылығын тудыруы мүмкін екенін айтты. Сондықтан ол Кисановаға сотқа жүгінуді ұсынған. Нәтижесінде сот оның ұстанымын қолдаған.
Осыдан кейін билік өкілдері 239 орынға қосымша конкурс жариялап, оның 59-ын қайтадан Кисанованың компаниясы иеленген. Алайда, әкімнің сөзінше, мемлекеттік тапсырыстың барлығын бір ғана кәсіпкерге беру мүмкін емес, өйткені билік барлық қатысушылардың және балалардың басым бөлігінің мүддесін ескеруге міндетті.
«Бұл жағдайда қандай шешім қабылданса да, біз сынның астында қалар едік. Ең дұрыс шешім жеткізушінің сотқа жүгінуі болды. Өйткені кейін қалған 68 кәсіпкерге жыл басында өткен конкурсты жыл ортасында неге жойғанымызды түсіндіруге тура келер еді. Төлемдер тоқтап қалар еді. Елестетіп көріңізші, 3300 бала бар, оның үлесінде шартты түрде алғанда, 360 қана бала бар. Ал қалған 2700 бала бала емес пе? Олардың да сабағын тоқтатуға тура келер еді», – деді әкім.
Байхановтың айтуынша, бұл жағдай бәрі отырған арқанды кесіп жіберумен тең болар еді.
