Спортшылардың Азиада ойындарына дайындық барысы қалай?
Туризм және спорт министрі Ермек Маржықпаев Ханчжоуда спортшыларымыздың Азиадаға дайындық барысымен танысты, - деп хабарлайды министрліктің баспасөз қызметі.
Алматы, NEGE. Қазақстандық спортшылар заманауи және жайлы қонақүйде, бір және екі орындық бөлмелерге орналасқан.
"Министр бірінші кезекте тұрғын үй-жайларды қарап шықты. Одан кейін спортшыларымыз тамақтанатын асханаға барды. Спортшылардың дені Ханчжоуға келді, бірақ соған қарамастан еш жерде кезек байқалмады. Бұл ұйымдастыру деңгейі мен сапасы жоғары екенін көрсетеді", - делінген хабарламада.
Ермек Маржықпаев ұлттық құраманың медициналық штабын да назардан тыс қалдырмады. Қытайға спортшылардың физикалық жағдайын мұқият бақылайтын 50-ге жуық маман барды. Дәрігерлер 24/7 жұмыс істеп жатқанын айтты.
"Министрлік Қазақстан командасы осы жарыстарға барынша қолайлы жағдайда қатыса алатындай үлкен жұмыс атқарды, ал спортшылар мен жаттықтырушылар-кез келген уақытта дәрігерлер мен жедел штаб тарапынан қолдауға сене алады. Әрине, біздің күш-жігеріміз бекер болмай, ұлттық құрама Азиадада сәтті өнер көрсетіп, өз жемісін береді деп үміттенеміз. Біз жарыстың басталуын күтеміз, спортшыларымызды қолдаймыз және олардың жеңісіне сенеміз", - деді Ермек Маржықпаев.