«Әйел затының артық шығыны»: Қазақстанда төсемдер бағасы тағы өсті
Қазақстанда әйелдерге ай сайын қажет төсемдер мен жеке күтім заттарының қымбаттауы көптеген отбасының тұрмыстық шығынын едәуір арттырды. Алайда бұл санат әлеуметтік маңызы бар тауарлар тізіміне енгізілмеген. Сол себепті баға нарық жағдайына қарай қалыптасады.
Астана, NEGE. Әлеуметтік желілерде қыз-келіншектер төсемдер бағасының айтарлықтай өскенін айтып, наразылық білдіруде. Energyprom.kz дерегінше, өткен жылы бұл өнімдердің құны 5,5%-ға қымбаттаған.
Желі қолданушылардың айтуынша, бір айға бір ғана қаптама жеткіліксіз, сондықтан бірнешеуін сатып алуға тура келеді. Соның салдарынан ай сайынғы шығын кей отбасылар үшін «бір килограмм еттің бағасымен тең» болып отыр.
Бұл шығын әсіресе мектеп оқушылары мен студенттерге, сондай-ақ бірнеше қыз тәрбиелеп отырған және көпбалалы отбасылардың бюджетіне қосымша салмақ салады.
Сондай-ақ, желі қолданушылары әйелдер бұл өнімдерді «алғым келмейді» деп пайдаланбай қоя алмайтынын айтады. Себебі олар физиологияға байланысты ай сайын қажет.
«Бағасы азық-түлікпен бәсекелесіп тұр. Бір келі еттің құнымен бірдей», – деп жазды zhgkms есімді қолданушы.
Ал vayocita: «Әйел болғанымыз үшін осындай қосымша шығынға батуымыз керек пе?» деп пікір қалдырған.
БАҚЫЛАУ БАР МА?
Сауда және интеграция министрлігі төсемдер мен әйелдерге арналған жеке күтім заттары әлеуметтік маңызы бар тауарлар қатарына жатпайтынын еске салды. Сондықтан олардың бағасына мемлекеттік бақылау жүргізілмейді, құны нарықтағы сұраныс пен ұсынысқа қарай қалыптасады.
«Бұл өнімдер әлеуметтік маңызы бар тауарлар тізіміне кірмейді, сол себепті мемлекеттік бақылау жүргізілмейді, бағасын нарық реттейді. Кәсіпкерлік кодекске сәйкес, үкімет тек 31 тауардың бағасын бақылайды», – деп хабарлады министрліктің баспасөз қызметі.
ДИСТРИБЬЮТОР ТҮСІНДІРМЕСІ
Қазақстандағы жеке күтім мен санитарлық өнімдер нарығы негізінен импортқа тәуелді. Мұндай тауарларды елге халықаралық брендтердің жергілікті дистрибьюторлары жеткізеді.
Редакция бірнеше ірі жеткізушіден пікір сұрағанымен, түсініктеме беруге тек нарықта орташа баға сегментінде сатылатын Bella бренді өнімдерін жеткізетін компания келісті.
Компанияның ресми өкілі Яна Герасимова соңғы жылдары өнім бағасының өскенін растады.
«Бағасы бірқатар факторлардың жиынтығына байланысты қалыптасады. Bella брендіне тиесілі тауарлар тек Ресейде ғана өндірілмейді, белгілі бір бөлігі Еуропада шығарылады. Сондықтан олар қолданыстағы заңнамаға сәйкес барлық салықтық талаптардан өтеді», – деді ресми өкіл.
Соңғы бір жылда валюта бағамдарының өзгеруі өзіндік құнға айтарлықтай ықпал еткен. Бұл импортталатын тауардың құнына тікелей әсер ететін негізгі факторлардың бірі ретінде аталды. Бұған қоса, логистикалық және қоймалау қызметтерінің қымбаттауы баға құрылымына қосымша жүк түсірген. Халықаралық және республика ішілік тасымалдау шығындары орта есеппен 20–30%-ға, қоймада сақтау шығындары 15–25%-ға артқан. Соңғы рет баға 2025 жылдың жазында түзетілген.
Ал қазақстандық қыз-келіншектер қазіргі жағдай өзгермесе, «дәке мен мақта қолданатын кезеңге қайта оралуымыз мүмкін» деп алаңдаушылық білдіреді.
