Ауыл шаруашылығы министрін 713 млн теңге жөніндегі сұрақ қуанта қоймады
Үкіметтегі брифингте БАҚ өкілдері ауыл шаруашылығы министрі Айдарбек Сапаровтан туыстарының бұрын алды делінген субсидиялары туралы сұрады.
Астана, NEGE. Журналист министрдің інісі Алтынбек Сапаровтың 2019–2020 жылдары бюджеттен шамамен 713 млн теңге алғаны туралы айтылғанын еске салып өтті.
Сапаров бұл тақырыпқа жауап беруден шаршағанын аңғартты.
«Жеке сұрақтарға мен талай рет жауап бердім, интернеттен, YouTube-тен қараңыздар. Өздеріңіз де білесіздер, менің бұл іске қатысым жоқ. Мен құрылтайшы емеспін, олар өз жұмыстарын өздері істеп жатыр. Барлығы жұмысын жоғары деңгейде атқарып жатыр. Мен оған қатыспаймын да, білмеймін де, кіріскім де келмейді», – деді министр.
2024 жылы Солтүстік Қазақстан облысының әкімі Ғауез Нұрмұхамбетовке де министр Сапаровтың отбасы елдің солтүстігіндегі барлық ауыл шаруашылығы жерлерін «басып алып», бұл саланы монополиялағаны туралы ақпаратқа пікір білдіруге тура келген. Әкім бұл ақпараттың шындыққа жанаспайтынын айтып, Алтынбек Сапаровтың (министрдің інісі) кәсіпорны өңірдегі үздіктердің бірі екенін атап өткен.
