Ата-аналар елімізде эпилепсияға қарсы дәрі тапшы деп шағымдануда
Қазақстанда мүгедектігі бар адамдардың мәселесі әлі де өзекті. Әсіресе дәрі-дәрмек тапшылығы, медициналық-әлеуметтік сараптамадан (МӘС) өту қиындығы және әлеуметтік қызметтердің қолжетімсіздігі тұрғындарды алаңдатады.
Астана, NEGE. Соңғы уақытта сал және эпилепсия дертіне шалдыққан науқастарға қажет «Клоназепам» препаратының тапшылығы қоғамда алаңдаушылық туғызды. Бұл мәселені Республикалық «Ерекше балалардың ата-аналар одағы» ұйымының Астана қалалық филиалының өкілі Гүлсан Мауина көтерді.
Оның айтуынша, аталған дәрі қазір елімізге Польшадан жеткізіледі. Ал Қазақстанда өндірілетін баламасына ата-аналар тарапынан шағым көп.
«Ата-аналардың айтуынша, отандық препараттың әсері әлсіз. Кей жағдайда балалардың денсаулығында оң нәтиже байқалмайды. Сондықтан сапалы әрі тиімді дәрімен тұрақты қамтамасыз ету мәселесі өте маңызды», – дейді ұйым өкілі.
Белсенділердің сөзінше, мүгедектігі бар азаматтарды алаңдататын тағы бір мәселе – мүгедектікті жыл сайын қайта растау талабы. Медициналық-әлеуметтік сараптама комиссиясынан қайта-қайта өту ата-аналар мен науқастар үшін уақыт пен жүйкеге салмақ түсіретін күрделі рәсімге айналған.
Әлеуметтік қолдау бағытында да шешілмеген мәселелер бар. Мәселен, инватакси қызметі ІІІ топтағы мүгедектігі бар азаматтарға қарастырылмаған. Соның салдарынан көптеген адам күнделікті қатынау мен ем-домға баруда қиындық көреді.
Бұдан бөлек, мүгедектігі бар балаларды тәрбиелеп отырған ата-аналарға жеңілдетілген автонесие беру мәселесі де бірнеше жылдан бері көтеріліп келеді. Бұл ұсыныс бұған дейін Көлік министрлігіне жолданғанымен, нақты шешім қабылданбаған.
Ресми мәліметке сәйкес, бүгінде Астана қаласында 41 089 мүгедектігі бар адам тұрады. Оның 28 984-і – ересек, ал 12 105-і – балалар.
Қоғам белсенділерінің айтуынша, мүгедектігі бар азаматтардың мәселесін тек талқылап қана қоймай, нақты шешім қабылдайтын уақыт жеткен.