Астық пойыздары жиналып қалды: Қазақстан көрші елдермен қабылдау көлемін ұлғайтуға келісіп жатыр
Қазақстан Қытай және Өзбекстан теміржол әкімшіліктерімен пойыз қабылдауды арттыру жөнінде келіссөз жүргізіп жатыр.
Астана, NEGE. 2025 жылдың қазан-қараша айларында Қазақстан мен Қытай арасындағы түйіспе пункттерінде Қытай тарапынан пойыз қабылдау азайды. Бұған астық тиелген вагондарды 5–10 күн бойы ұзақ зертханалық тексеруден өткізу себеп болған. Пойыздардың көп жиналып қалмауы үшін вагондар Қытайдың қабылдау мүмкіндігіне қарай келісілген тәуліктік жүктеме шеңберінде ғана жіберіліп жатыр.
Астық экспортының 70 пайызы маусым кезінде Орталық Азия елдеріне, әсіресе Өзбекстанға тиесілі. Алайда Өзбекстан темір жолының өткізу мүмкіндігі кіретін жүк ағындарынан төмен болғандықтан, жүк пойыздары сол жерде де жиналып қалады.
Былтыр алыс шетелге астық тасымалдау үшін мемлекет көлік шығыстарын субсидиялауға 40 млрд теңге берген. Биыл субсидия қолданылмайтындықтан, экспорттаушылар алыс бағыттардан бас тартып, астықты Қытай мен Орталық Азияға көбірек жөнелте бастады. Бұл жекелеген шекара өткелдеріне және көрші елдердің инфрақұрылымына жүктемені күшейтті. Егер субсидия қайта енгізілсе, экспорт бағыттары әртүрлі аймақтарға қайта бөлініп, Қытай мен Өзбекстанға түсетін жүктеме азаяды.
ҚТЖ астық тасымалдауға қажетті вагондардың бәрін жұмылдырған, қажет болса қосымша вагон тартылады. Министрліктер мен бизнес өкілдері бірігіп жағдайды күнделікті бақылап отыр. Астық штабы жұмыс істейді. Қазақстан Қытай және Өзбекстан темір жолдарымен пойыз қабылдауды көбейту, тексеруді жеделдету туралы келіссөздер жүргізуде.
Анықтама үшін:
Маркетингтік 2025-2026 жылдары ішінде (қыркүйек — 20 қараша) 3,8 млн тонна астық (+18%) тасымалданды, оның ішінде: 900 мың тонна – ішкі нарыққа (+32%), 2,9 млн тонна – экспортқа (+14%). Орталық Азия елдеріне экспорт 1,8 млн тоннаны (+24%) құрады, оның 1,3 млн тоннасы — Өзбекстанға (+34%).
