Астанадағы санавиация қызметкерлері жалақы мен арнайы мәртебе беруді талап етті
Медициналық авиация мобильді бригадасының қызметкерлері 15 жылдан бері өз мәртебесін заң жүзінде бекітуді талап етіп келеді, алайда бұл мәселе әлі күнге дейін шешімін таппаған. Салдарынан жалақы мен әлеуметтік кепілдіктерден құр қалып отыр.
Астана, NEGE. Астанада 20-дан астам қызметкер Шұғыл медицинаны үйлестіру ұлттық орталығының алдына жиналып, журналистерге уәжін айтты. Олардың сөзінше, жоғары тәуекел жағдайында жұмыс істесе де, әлеуметтік кепілдіктер мен жалақы өсімі жағынан жедел жәрдем қызметкерлерімен теңестірілмей отыр.
15 жылдан бері бұл мәселені көтеріп келе жатқанын айтқан фельдшер Гүлден Раева медициналық авиация қызметкерлеріне нақты статус берілмейінше, жүйелі өзгеріс болмайтынын жеткізді.
«Біз медициналық авиация қызметкерлерінің статусын сұрап келеміз. Егер статус болса, соған сай жалақы да өзгереді. Жеңілдіктер болады, еңбек демалысы ұзарады, сауықтыру төлемдері көбейеді. Мұның бәрі бір ғана шешілмей келе жатқан мәселеге тіреліп тұр», – дейді Раева.
Оның сөзінше, медициналық авиация қызметкерлері №225 бұйрық аясында кепілдендірілген медициналық көмек көрсету жүйесінде жедел жәрдеммен бірге көрсетілген. Алайда жедел жәрдем қызметкерлерінің жалақысы көтерілген кезде бұл өзгеріс авиация мамандарына қолданылмаған.
«Жедел жәрдем қызметкерлеріне еңбекақы өседі. Бірақ бұл өсім бізге қатысы жоқ болып шықты. Сонда біз кімбіз? Жедел жәрдем көмегіне жатамыз ба, әлде мүлде басқа санатпыз ба?» – дейді фельдшер.
20 жылдан бері авиация бригадасында қызмет ететін фельдшер Асылбек Тоқтыбаев әрбір әуе сапары денсаулыққа айтарлықтай салмақ түсіретінін айтады.
«Әр рейс – біз үшін үлкен тәуекел. Ұшақта гипоксия болады, қысым өзгереді, турбуленттік бар. Ауа жетіспей, бас ауырады, әлсірейсің. Кейде 20 сағат бойы ұшақта отырамыз. Түнде демалмай қайта оралатын кездер болады. Бірақ осының бәрі жалақыға қосылмайды», – дейді ол.
Бұрын ұшу сағатына қосымша ақы төленгенімен, кейін бұл төлемдер тоқтатылған. Қазір мамандар айлық ставкамен ғана шектеледі. Пандемия кезінде жалақы 20–30% өскенімен, содан бері өзгермеген. Бүгінде медициналық авиация фельдшерлерінің айлығы 300–350 мың теңге шамасында.
«Мұғалімдердің еңбекақысы бірнеше жылда өсіп отырады. Иә, әрине құрметті мамандық иелері, олардың еңбегі бағалануы керек. Бірақ біз де адам өмірін ажалдан арашалап қаламыз. Түрлі ауыр оқиғаларды көрдік. Әрбірінің басына түскен кеселді көргенде жылағың келеді. Мысалы ауыл-аймақтан науқасты шұғыл жеткізерде алып-ұшып, бір сәт демалмастан жұмыс істейміз. Әдеттегі жедел жәрдем мамандарының айлығы өсті. Біз, әуедегі жедел көмек қызметкерлері, сол баяғы жалақы деңгейінде қалып отыр», – дейді тәжірибелі маман.
Ал Шұғыл медицинаны үйлестіру ұлттық орталығы төрағасының орынбасары Асхат Сапаров санитарлық авиация қызметкерлерінің жалақысын көтеру туралы Денсаулық сақтау министрлігінен нақты тапсырма түспегенін мәлімдеді.
«Денсаулық сақтау министрлігіне ресми хат жолдайын деп жатырмыз. Біз – бюджеттік ұйымбыз. Қаржыландырудың бәрі министрлік арқылы жүзеге асады. Сондықтан жалақыны өз бетінше көтеруге немесе өзгертуге өкілеттігіміз жоқ. Министрліктің шешіміне қарай әрекет етеміз», – деді Сапаров.
Асхат Сапаровтың айтуынша, медициналық мобильді бригада қызметкерлеріне ұшқыштарға қойылатын ұшу уақытына қатысты шектеулер қолданылмайды. Себебі олар авиация қызметкерлері емес, медициналық ұйымдардың қызметкерлері болып есептеледі.
