Астанадағы элиталы мектепте балалар астан уланып қалды
Астанадағы «Мирас» жекеменшік мектебінде оқушылардың жаппай улануына байланысты жоспардан тыс тексеру басталды.
Астана, NEGE. Бұл туралы бүгін Орталық коммуникациялар қызметі алаңында Астана қаласы cанитариялық-эпидемиологиялық бақылау департаменті басшысының орынбасары Мұхамғали Арыспаев мәлімдеді.
Халықаралық мектептегі бұл жағдай 30 қаңтарда тіркелген. Бір сыныпта оқитын он алты баланың сегізі медициналық көмекке жүгінген. Алдын ала болжам бойынша, балалар түскі астан уланған.
«Алты балаға жедел ішек инфекциясы, ал екеуіне асқазан-ішек жолдарының функционалдық бұзылыстары диагнозы қойылды. Зардап шеккендер – негізінен 5–6 жастағы, даярлық сыныбында оқитын балалар. "Мирас" халықаралық мектебінде жоспардан тыс тексеру жұмыстары басталды», – деді Арыспаев.
Департамент өкілінің мәлімдеуінше, қазіргі уақытта балалар үйден ем қабылдап жатыр, олардың жағдайы бақылауға алынған.