Астанада жолдарды жөндеу жұмыстары қызу жүріп жатыр
Аудан әкімдігі баспасөз қызметінің хабарлауынша, жол жөндеу жұмыстары тамыз айында аяқталады.
Астана, NEGE. Дәл қазіргі таңда тұрғын алаптардағы 20 көше мен Алматы ауданының орталық 10 көшесі жаңару үстінде. Сонымен қатар Железнодорожный тұрғын алабында орналасқан Екібастұз көшесі де күрделі жөндеуден өтіп жатыр. Жоспарға сәйкес, аталған көшедегі жолдарға асфальт пен тротуар төселіп, кәріз желілері және сумен жабдықтау, сыртқы жарықтандыру жұмыстары жүргізіледі. Қазіргі кезде күн тәртібіндегі жоспардың 80%-ы орындалған.
Айта кетейік, 2010 жылы Астанадағы шет аймақтарды дамыту тұжырымдамасы бекітілген еді. Оған сәйкес, инженерлік желілер мен жолдар салу жұмыстары басталған. Атқарылған жұмыстарды атап айтар болсақ, 2019-2022 жылға дейін Көктал-1, Көктал-2, Интернациональный, Комсомольский, Достық тұрғын алаптарында, Оңтүстік-Шығыс шағын ауданының сол жағында инженерлік желілер салынған. Ал соңғы төрт жыл ішінде жалпы ұзындығы 80 шақырымды құрайтын 237 көше жаңартылды. Биыл жергілікті және республикалық бюджет есебінен 6 тұрғын алаптағы 7 жобаны іске асыру мақсатында қаражат аударылды.
Мұнымен қоса Елордадағы Көлік және жол-көлік инфрақұрылымын дамыту басқармасы Петров көшесіндегі жол төсеміне орташа жөндеу жұмыстарын жүргізуді қолға алған. Жол төсемін қалыпқа келтіру Жирентаев көшесінен Жұмабаев даңғылына дейінгі учаскеде жүргізіледі.
Жол қозғалысы қауіпсіздігін қамтамасыз ету мақсатында аталған жұмыстар қаланың ПКҚ әкімшілік полиция басқармасының келісімімен жүзеге асып отыр.
